• Los conceyos y mancomunidaes van tener un mes de plazu pa presentar les solicitúes per vía telemática a partir de mañana

La Conseyería de Salú convoca subvenciones pa entidaes locales, por valor de 935.000 euros, empobinaes a fomentar la calidá de vida de la ciudadanía y protexer a les persones consumidores. El Boletín Oficial del Principáu (Bopa) publicó güei les bases de les ayudes, que se conceden por concurrencia competitiva.
 
Los fondos repártense en dos llinies d’actuación: 825.000 euros pa planes y programes de promoción de salú y bienestar y 110.000 pa promover y difundir los derechos de los consumidores.
 
Como novedá, Salú aumenta anguaño en 25.000 euros el presupuestu destináu a la primera d’estes llinies y amplía tamién los criterios de valoración y les árees d’actuación, cola mira d’ayudar a ameyorar la situación de la salú de la población. L’añu pasáu beneficiáronse d’estes ayudes 40 conceyos y 4 mancomunidaes, que presentaron iniciatives de calter comunitariu.
 
La segunda llinia, qu’apoya acciones municipales pa que la ciudadanía conoza los sos derechos en rellación col consumu y los exerza de manera crítica y responsable, sofita campañes, edición de folletos, llabores d’inspección y actuaciones en materia de control de seguranza de los productos y servicios.
 
Les entidaes locales tienen un mes de plazu, a partir de mañana, pa presentar les solicitúes al traviés de la sede electrónica del Principáu (https://sede.asturias.es), introduciendo’l códigu de la ficha de serviciu AYUD0228T01 pa la llinia promoción y desenvolvimientu de la protección de los consumidores y AYUD0229T01 pa la subvención de planes o programes de promoción de la salú.
 
El Plan de Salú del Principáu define la promoción de la salú como’l procesu que fai posible que les persones aumenten el control sobre la so situación p’ameyorala, polo que nun abarca namás acciones empobinaes directamente a aumentar les sos habilidaes y capacidaes, sinón tamién les dirixíes a modificar les condiciones sociales, ambientales, económiques, llaborales, xeográfiques, culturales y educatives que tienen impactu nos determinantes de salú.
 
Les actividaes que les entidaes locales impulsen nesti ámbitu xeneren emplegos directos y tamién repercuten n’organizaciones non gubernamentales, asociaciones ensin ánimu d’arriquecimientu y empreses del tercer sector empobinaes al  bienestar de la comunidá.​​​​​​​