Categories Navigation

Categories Navigation

Mediu Ambiente destina 872.000 euros a trés proyectos de saniamientu y abastecimientu nel conceyu d’Ibias

10/05/2022

De izquierda a derecha, Javier Rodrigo, director de la obra; Marcos Rodríguez y Gemma Álvarez, concejal y alcaldesa de Ibias, respectivamente, y Vanesa Mateo, directora general del Agua, en la visita a la obra de saneamiento de Seroiro

  • La directora xeneral del Agua visita les obres de Seroiro, que van acabar a últimos del 2022 con una inversión de 237.583 euros
  • Vanesa Mateo anuncia que la Conseyería tamién va facer anguaño les actuaciones en Bustelo y A Estierna, con un presupuestu de 635.200 euros

La Conseyería d’Alministración Autonómica, Mediu Ambiente y Cambéu Climáticu destina anguaño 872.777 euros a trés proyectos de saniamientu y abastecimientu n’Ibias, según anunció güei la directora xeneral del Agua, Vanesa Mateo, nuna visita al conceyu.

 Mateo adelantó que les obres de saniamientu de Seroiro, que van beneficiar a 34 habitantes, van acabar a últimos del 2022 y tienen una inversión de 237.583 euros, cofinanciaos pol Fondu Européu de Desenvolvimientu Rexonal (Feder). L’actuación consiste na execución d’una rede de saniamientu con 725 metros de colectores, que percuerren mayoritariamente caminos municipales y van recoyer tolos vertíos xeneraos nel llugar.

 La rede va terminar nuna estación depuradora nueva d’agua residual, que va disponer d’un decantador primariu, un reactor biolóxicu de biodiscos con una superficie de 350 metros cuadraos, un bombéu de recirculación de basa y un pozu d’inspección, arriendes d’un colector que va llevar l’agua tratao a la riega de Seroiro.

 Amás, la directora xeneral avanzó que la Conseyería va sacar a llicitación d’equí a poco les obres de saniamientu de Bustelo, población onde tamién va executase una rede de saniamientu de 1.408 metros de llargor y una depuradora compacta de biodiscos. Anque la partida presupuestaria prevista de mano xubía a 350.000 euros, foi menester revisala al alza, por causa del aumentu del preciu de los materiales, polo que l’actuación va llicitase en 460.532 euros.

 L’actuación va beneficiar a 23 habitantes y va facer posible ameyorar la calidá del agua de la riega de Bustelo, tributaria d’El Río Ibias y, polo tanto, incluyida na Rede Natura como zona especial de caltenimientu (ZEC).

 Igualmente, el Principáu cunta realizar anguaño’l proyectu d’ameyoramientu del abastecimientu d’agua d’A Estierna, al que va dedicar 174.662 euros. Con esta intervención, va facese frente a les dificultaes d’abastecimientu d’esti llugar n’época de seca, coincidiendo con una medría de la población por efectu del turismu y segundes residencies, polo que va dase serviciu a cuasi 120 habitantes.

 Los trabayos van consistir nuna recoyida d’agua potable adicional a lo existente, que va garrar el recursu de la parte alta d’El Regueiru das Mestas. Dende esta zona va empezar la conducción, con un llargor de 2.230 metros, hasta algamar l’arqueta de la otra recoyida existente, dende onde yá hai conexón al depósitu de distribución.​