• La Conseyería de Mediu Rural y Cohesión Territorial impulsa esta iniciativa en collaboración con Educación y l’Institutu Asturianu d’Alministración Pública Adolfo Posada
• Les xornaes de trabayu nos centros educativos empezaron güei na Escuela Pública Reconquista, de Cangues d’Onís

 
La Conseyería de Mediu Rural y Cohesión Territorial impulsa una iniciativa pa fomentar la participación del alumnáu de Primaria na redacción de la Llei d’Ordenación Integral del Territoriu d’Asturies (LOITA) nueva. Al traviés de delles actividaes, y en collaboración con Educación y col Institutu d’Alministración Pública Adolfo Posada, quier recoyer la visión de los más mozos na ellaboración de la norma. 
 
Les xornaes d’esplicación nos centros educativos empezaron güei na Escuela Pública Reconquista de Cangues d’Onís, onde se celebró ún de los trés talleres infantiles dedicaos a trabayar na conocencia del urbanismu. Nesti contestu, l’alumnáu de 5.u y 6.u de Primaria participó en delles actividaes onde trataron, ente otres cuestiones, les característiques del territoriu d’Asturies, cómo s’articula y qué mecanismos existen pa ordenalu.
 
Esta xornada, a la qu’asistió la directora xeneral d’Ordenación del Territoriu y Urbanismu, Sonia Puente Landázuri, va repetise n’otros trés centros públicos: La Ería, n’Uviéu; Aniceto Sela, en Mieres; y la escuela de Zarréu, en Degaña. Esta última va acoyer mañana, miércoles, el taller infantil.
 
Pola mor de la redacción de la LOITA, y dientro d’esta fase d’información y consulta, el Principáu organizó delles actividaes. Asina, en collaboración col institutu Adolfo Posada, punxéronse en marcha xornaes de contraste y debate con otres comunidaes. Tamién se celebraron reuniones con maxistraos, delles universidaes españoles y alcuentros específicos con colectivos con gran implantación nel territoriu. Amás, creáronse perfiles de la LOITA nes redes sociales y llanzáronse delles encuestes empobinaes a conceyos, profesionales y públicu en xeneral. Nesti últimu trabayu participaron más de mil persones, que presentaron más de 15.000 suxerencies a la llei nueva.