• La midida centráse naquellos plantígrados que reinciden en comportamientos como entrar en pueblos o atacar al ganáu
• ​​​​​​​La información algamada con esti mecanismu sirve pa evaluar la eficacia de les acciones de disuasión y prevención de daños

El Gobiernu d'Asturies retoma los trabayos del programa de captura y adiosiguimientu d'osos pardos avezaos a la presencia humana y que presenten conductes repitíes d'acercamientu a zones habitaes. Esti tipu d'intervención activa supón una ferramienta bien útil para conocer y prever problemes y aplicar midíes afayadices de disuasión en cada casu.

El proyectu, que se suspendió nel periodu d’iviernu, coincidiendo cola dómina tradicional d'envernía de los plantígrados, céntrase, de forma preferente, n'exemplares que presenten un nivel d’habituación estremu o que pueden xenerar situaciones socialmente conflictives. Por casu, osos que s'internen con reiteración n'asentamientos humanos en busca de comida en cubos de basura, garaxes, tenaes o gallineros, o qu'ataquen al ganáu de forma repitida nes proximidaes o dientro d'un pueblu. Tamién se focaliza naquellos animales que nun fuxen énte la presencia cercana de persones a plenu día, magar estes situaciones son escepcionales.

Esta midida ponse en práctica cuando'l restu d'acciones recoyíes nel Protocolu pa la intervención con osos nel cordal cantábricu nun surten efectu.

El programa, que pretende apangar los conflictos ente los osos y les actividaes humanes, busca tamién ameyorar la planificación territorial, facilitar el caltenimientu de la especie y utilizala como centinela énte'l furtivismo y la contaminación ambiental. So la coordinación de l'Alministración autonómica, un equipu integráu por investigadores y técnicos del Principáu, del Institutu Mistu d'Investigación en Biodiversidá, de la Fundación Oso Pardo y de la Fundación Oso d'Asturies encárgase de desenvolver esta iniciativa.

Les actuaciones realícense en cumplimientu del Protocolu pa la intervención con osos nel cordal cantábricu, ellaboráu per Asturies, Galicia, Castiella y Llión y Cantabria y el Ministeriu pa la Transición Ecolóxica y el Retu Demográficu, y aprobáu pola Comisión Estatal pal Patrimoniu Natural y la Biodiversidá'l 24 de xineru de 2019.

Siguimientu d'exemplares

Los resultaos llograos hasta agora n'Asturies, y la esperiencia d'otres poblaciones d'osos n'Europa y Norteamérica, dexen evaluar la captura y radiomarcaxe como una importante ferramienta de xestión pa la coexistencia ente osos y persones. La captura resulta en sí mesma una ferramienta de disuasión pa estos exemplares, pero amás el so siguimientu facilita l'aplicación d'otres midíes y apurre abondosa información p'ameyorar les polítiques de prevención de daños y resolución de conflictos, fundamentales pa garantizar el caltenimientu del osu pardu.

El programa de captura realízase con trampes culvert, ún de los procedimientos más utilizaos y seguros, al amenorgar de forma sustancial los riesgos. Una vez realizada la toma de muestres y datos, según l'allugamientu del crotal y el dispositivu GPS, l'osu recupera nel mesmu sitiu baxo supervisión.

L'añu pasáu realizáronse dos captures d'oses na zona suroccidental, onde s'alcuentra la población más numberosa. Una d'elles entraba nun pueblu de nueche a alimentase nos contenedores de basura y, anque tres la so lliberación el GPS que se-y punxo acabó esprendiéndose, la so captura resultó una midida de disuasión útil, pos el marcaxe con crotal nuna oreya permitió la so observación nuna carbayera alloñada del pueblu, onde la vio alimentándose d'abiyotes na seronda. Coles mesmes, les cámares de fototrampéu instalaes na localidá y el siguimientu de los contenedores de basura muestren que la fema nun volvió pellí.

La segunda intervención foi con otra osa, que taba acompañada de trés críes y atacara delles cabeces de ganáu ovín. Tres l'allugamientu del dispositivu GPS y la so lliberación, comprobóse que permaneció activa tol iviernu, que nos últimos meses alimentóse mayoritariamente d'abiyotes, castañes y yerba, y que percorrió un área de cerca de 50 kilómetros cuadraos. A primeros d'abril, el grupu familiar dixebróse y la osa entró en celu, colo que realizó llargos desplazamientos siguida por dellos machos. En tou esti periodu de siguimientu, travesó o tuvo cerca de dellos pueblos, pero siempre de nueche y ensin atacar al ganáu.

vídeo grabao l'añu pasáu nel marcu del programa​​​​​​​