• La Conseyería de Ciencia dedica 100.000 euros pa la movilidá del personal predoctoral per un periodu d’ún a trés meses

 El Gobiernu d'Asturies publicó la convocatoria d'ayudes pa qu'investigadores predoctorales del programa Severo Ochoa realicen estancies curties, d'ente unu y trés meses, en centros internacionales de reconocíu prestíu. La Conseyería de Ciencia, Innovación y Universidá destina una partida de 100.000 euros, con posibilidá d'ampliación, a esta iniciativa, que trata d'impulsar la formación n'investigación y docencia mientres la realización de la tesis doctoral.

Pueden concurrir a esta convocatoria, publicada güei nel Boletín Oficial del Principáu (Bopa), persones beneficiaries na actualidá d'una ayuda del programa Severo Ochoa, con independencia del añu de concesión. La cuantía máxima ye de 3.000 euros y el plazu pa presentar les solicitúes, de dos meses.

Estes estancies de movilidá internacional faciliten l'aprendizaxe en llaboratorios d'investigación, l'alquisición de nueves técniques instrumentales y otres actividaes directamente venceyaes cola formación nun centru d'investigación de prestíu fuera d'España.

La Dirección Xeneral d'Universidá atendió nes últimes convocatories toles solicitúes recibíes pa realizar estancies curties. El pasáu añu, 24 persones beneficiáronse d'esti programa y pudieron completar la so formación en centros de Francia, Alemaña, Portugal, Reinu Uníu, Irlanda del Norte, Suiza, Dinamarca, Polonia, Países Baxos, Noruega, Eslovaquia, Austria, Italia, Ecuador, Bélxica ya Israel.​​​​