• El gallardón constituye un referente de prestixu nacional y anguaño coincide col centenariu del nacimientu del académicu

La Conseyería de Cultura, Política Llingüística y Turismu publicó güei la 21.er convocatoria del Premiu Emilio Alarcos de Poesía 2022, que coincide col centenariu del nacimientu del llingüista Emilio Alarcos Llorach. El gallardón, dotáu con 6.000 euros, distingue obres inédites con una estensión mínima de 300 versos.

El plazu de presentación de poemarios va ser de trés meses a partir de güei, fecha na que se publicó la convocatoria nel Boletín Oficial del Principáu: https://cutt.ly/CHwfOeo

Esti premiu constituye un referente de prestixu nel panorama poéticu nacional polos nomes qu’axunta nel so palmarés, ente los que figuren Javier Almuzara, Eduardo Jordá, Emilio Martín Vargas, Irene Sánchez Carrón, Ioana Gruia, Federico Gallego Ripoll, Enrique Gracia Trinidad, Antonio Praena y Julio Rodríguez.

De primeres, el certame presidiólu Ángel González, el poeta asturianu más renomáu del sieglu pasáu y ún de los más relevantes de la xeneración del 50, y dende’l 2008 encabézalu Luis García Montero, director actual del Institutu Cervantes.

Nos sos 21 años de vida, formaron parte del xuráu figures de gran relevancia nos ámbitos de la poesía, la edición, la crítica lliteraria o l’universitariu, como Francisco Brines, Carlos Marzal, Aurora Luque, Caballero Bonald, Chus Visor, José Luis García Martín, Luis Alberto de Cuenca o Josefina Martínez, directora de la Cátedra Emilio Alarcos Llorach, que participa dende la primer edición.​