Categories Navigation

Categories Navigation

Educación presenta unos currículos d’ESO y Bachilleratu qu’apuesten pola equidá y potencien la optatividá y la dixitalización

12/05/2022

Un momento del acto

  • El currículu de Secundaria incluye Educación en Valores Cívicos y Éticos en 3.u y caltién Filosofía, Cultura y Heriedu Clásicu
  • La Conseyería estiende’l trabayu por ámbitos hasta 2.u d’ESO y incorpora un trabayu multidisciplinar por cursu​​​​​​​
  • El Bachilleratu Xeneral va ufiertase de manera xeneralizada nos centros

Los currículos nuevos d’Enseñanza Secundaria Obligatoria (ESO) y de Bachilleratu n’Asturies afonden nel aprendimientu competencial, que se va impartir yá dende Infantil; ríxense por principios tresversales, como la igualdá; ponen el focu na dixitalización; atienden a la diversidá del alumnáu; y aumenten la optatividá. La conocencia de la realidá asturiana, incluyida la llingua, o’l trabayu por proyectos y ámbitos son dalgunes de les premises que la Conseyería d’Educación siguió na concreción autonómica de la LOMLOE.

El llabor básicu de los grupos, que trabayaron al empar col Ministeriu d’Educación y Formación Profesional, consistió en reformular principios y estratexes p’ayudar al desenvolvimientu integral del alumnáu, atendiendo a la diversidá y buscándo-y instrumentos que-y dexen formase d’alcuerdu a los sos intereses, pa que pueda trazar un proyectu de vida y encarar con solvencia’l futuru.

Dambes etapes siguen marcaes pol enfoque competencial, que se rellaciona col deprendimientu a lo llargo de la vida. En xeneral, la llingua estranxera caltién la carga horaria y la llingua asturiana gana 3 hores, inclúyense asignatures rellacionaes cola dixitalización y, dientro del marxe autonómicu, ufiértense Filosofía y Heriedu Clásicu.

Asina lo esplicó esta mañana la conseyera d’Educación, Lydia Espina, que, acompañada pol director xeneral d’Ordenación, Evaluación y Equidá Educativa, David Artime, adelantó les llinies maestres que van rexir a partir del mes de setiembre. Esta mesma información treslladóse previamente a les direcciones de los centros que tán rematando la planificación del cursu que vien.

 

El currículu d’ESO

L’oxetivu de la etapa d’Educación Secundaria Obligatoria, que caltién la estructura en cuatro cursos académicos, ye que l’alumnáu algame los elementos básicos de la cultura, sobre manera nel terrén humanísticu, artísticu y científico-tecnolóxicu, y que pueda desenvolver vezos d’estudiu y trabayu que lu preparen pa estudios posteriores o p’acceder al mercáu llaboral.

La ESO organízase en materies y, nos dos primeros cursos, los centros tamién van estructurar los conteníos por ámbitos, como en Primaria. Tamién van dedicar una parte del tiempu llectivu al desenvolvimientu de proyectos significativos y a la resolución collaborativa de problemes. El currículu nun establez un porcentaxe mínimu de la carga horaria, pero sí recueye que tien qu’haber, polo menos, un trabayu multidisciplinar por cursu, que va poder configurase como un monográficu, una investigación o un plan de deprendimientu y serviciu.

En cuantes a les materies comunes, gana carga horaria Tecnoloxía y Dixitalización en 2.u. En 4.u, dientro de les asignatures d’ufierta obligatoria, ente les que l’alumnáu ha escoyer trés, incorpórase Formación y Orientación Personal y Profesional. Pela so parte, Educación en Valores Cívicos y Éticos va impartise en 3.u con dos sesiones selmanales. Optóse por esti cursu al considerar que l’alumnáu tien madurez p’asimilar conteníos y nun s’incluye en 4.u por nun facela coincidir con Filosofía, porque dambes son disciplines d’un ámbitu común.

Ente les optatives de la ESO, Asturies decidió precisamente incluyir, dientro del marxe autonómicu, Filosofía, con dos hores selmanales en 4.u. Nesi mesmu cursu, otra novedá rexonal ye Taller d’Economía Aplicada. Amás, en 1.u añádese Dixitalización y en 3.u Proyectu d’Emprendimientu Social. Cultura Clásica caltiénse en 2.u.

La recuperación del programa de diversificación curricular empobináu al alumnáu con dificultaes p’algamar los oxetivos de la etapa ye una de les novedaes. Va impartise en 3.u y en 4.u y va dexar llograr el títulu de graduáu, al revés de lo que pasaba col Programa pa la Meyora del Deprendimientu y del Rindimientu (PMDR) puestu en marcha cola llei anterior. Na mesma llinia, reorganícense los ciclos formativos de grau básicu pa que quien acabe con éxitu la so formación pueda tamién graduase.

Con estos currículos, tien importancia especial l’acción tutorial y la orientación educativa, psicopedagóxica y profesional, tanto nel accesu a un centru nuevu como na fase de deprendimientu y na elección posterior d’opciones formatives o profesionales.

La Conseyería caltién la evaluación en consonancia colo yá aplicao esti cursu al traviés del Real Decretu ministerial, que fixo posible la entrada en vigor de la LOMLOE ensin tener tovía aprobaos los currículos. Esto supón que la evaluación va ser continua, formativa, integradora y basada nel desenvolvimientu de les competencies. Les notes van espresase en términos cualitativos (insuficiente, suficiente, bien, notable y sobresaliente) y non numbéricos. Les calificaciones van ser por materies o por ámbitos, a tenor de la organización del centru. Nun va haber prueba estraordinaria de setiembre.

El currículu asturianu marca que la promoción y la titulación van ser decisiones colexaes, por mayoría simple si nun ye posible algamar el consensu del equipu. Va promocionar de manera automática quien supere tolos ámbitos o materies o tenga como máximu dos suspenses. Amás, l’alumnáu va poder pasar de cursu cuando se considere que les materies non superaes nun-yos van quitar de siguir con éxitu los estudios. Tamién va potenciase l’adaptación pedagóxica y el siguimientu de quien tenga dificultaes.

La repetición va ser una midida estraordinaria a la que namás va poder recurrise dos veces na enseñanza básica, qu’engloba Primaria y ESO.

 

El currículu de Bachilleratu

Esta etapa postobligatoria caltién la estructura en dos cursos. Sicasí, el currículu ye más flexible y va poder reordenase en trés p’alumnáu concreto: aquello que tea cursando enseñances profesionales de música o de danza, deportistes d’altu rindimientu y quien requiera d’apoyu educativu o presente circunstancies acreitaes que lo xustifiquen. La estructura defínese tanto pol repartu de materies como d’hores.

Dientro del marxe autonómicu, Educación adaptó les enseñances a les peculiaridaes de la comunidá. Esto tradúzse na introducción de conteníos y procedimientos nes materies que dexen conocer el patrimoniu cultural asturianu nun contestu más ampliu. Destaca, amás, la importancia de la dixitalización.

Sicasí, la gran novedá alcuéntrase nes modalidaes. Caltiénse igual el Bachilleratu d’Humanidaes y Ciencies Sociales. El de Ciencies pasa a llamase de Ciencies y Tecnoloxía, mentes que’l d’Artes estructúrase en dos víes: una d’Artes Plástiques, Imaxe y Diseñu; y otra de Música y Artes Escéniques. Amás, naz el Bachilleratu Xeneral, diseñáu pa flexibilizar la ufierta educativa y empobináu al alumnáu que nun se decidió por un área de conocimientu concreta y quier cursar de manera equilibrada materies científiques, tecnolóxíques, humanístiques, económiques y artístiques.

En toes estes modalidaes, l’oxetivu ye común: proporcionar la madurez intelectual, los conocimientos y les habilidaes pa incorporarse a la vida activa con responsabilidá y competencia. Va favorecer que l’alumnáu deprienda de manera autónoma, que sepa trabayar n’equipu y aplicar métodos d’investigación. L’horariu selmanal va ser de 31 hores como máximu, incluyida la tutoría y Relixón.

El Bachilleratu Xeneral va tener les mesmes materies comunes que los demás y les mesmes optatives. Va diferenciase poles de modalidá: va ser obligatorio cursar Matemátiques Xenerales en 1.u y Ciencies Xenerales en 2.u, y depués van poder escoyese dos asignatures más d’ente toles que s’ufierten nesta etapa. Amás, creáronse otres dos específiques pal alumnáu que quiera más esta opción: Economía, Emprendimientu y Actividá Empresarial, en 1.u; y Movimientos Culturales y Artísticos, en 2.u.

Nel Principáu esti Bachilleratu va ufiertase de manera xeneralizada. Abrióse la posibilidá a tolos centros educativos qu’impartan enseñances postobligatories y que tengan alumnáu interesao en matriculase. El númberu total va quedar definíu poles solicitúes.

El currículu asturianu tien otres peculiaridaes. La ufierta incluye asignatures diseñaes pola Conseyería dientro de les optatives. Son les de Heriedu Clásicu, Tecnoloxíes Dixitales Aplicaes (I y II), Recursos Enerxéticos y Sostenibilidá, Psicoloxía y Sociedá, Anatomía Aplicada, y Xestión de Fontes Documentales y Comunicación.

La evaluación docente va ser continua y va analizar si cada estudiante algamó los oxetivos y les competencies de la etapa. La promoción de cursu va ser automática con toes aprobaes o con una evaluación negativa en dos materies como máximu, de les qu’han volver a matriculase al otru añu. Con más de dos suspenses en 1.u, va repetise.

P’algamar el títulu va ser menester la evaluación positiva en toles materies de 1.u y 2.u, anque, de manera escepcional, van poder consiguilu con una non superada si la media de les demás ye superior a 5, si s’asistió de manera continuada a clas, si se realizaron los exámenes y si s’algamaron les competencies de la etapa. Han cumplise toes estes condiciones.​​​​​

 


Anexo I: horario bachillerato (pdf 264 Kb)​​​​​​​
Anexo II: horario ESO (pdf 156 Kb)