Categories Navigation

Categories Navigation

El Principáu llega a un alcuerdu colos sindicatos p’aumentar en 79 places la plantiya de l'Alministración autonómica

13/05/2022
  • Esti aumentu tien un costu de 2,2 millones, incluyíu yá nos presupuestos d'anguaño


La Conseyería d'Alministración Autonómica, Mediu Ambiente y Cambéu Climáticu llegó güei un alcuerdu colos sindicatos p'aumentar la plantiya de l'Alministración autonómica en 79 places, de les que 54 correspuenden al organismu autónomu Establecimientos Residenciales p’Ancianos d'Asturies (ERA), 18 al Serviciu Rexonal d'Investigación y Desenvolvimientu Agroalimentariu (Serida); 3 al Centru Residencial de Cabueñes, 3 al Serviciu Públicu d'Emplegu (Sepepa), y una al Serviciu de Salú (Sespa).

L'alcuerdu producióse na xunta de la mesa xeneral de negociación de l'Alministración tocante al espediente de cambéu de la relación y del catálogu de puestos de trabayu, presidida pol director xeneral de Función Pública, Miguel Ángel Rodríguez, y firmáronlu los sindicatos UXT, CC.OO., CSIF y SAIF, mentes que FSES abstúvose. 
 
Esti aumentu de places, incluyíu na Llei de Presupuestos  Xenerales del Principáu d'anguaño, va suponer un costu global de daqué más de 2,2 millones.

Amás, alcordóse reforciar la Oficina de Proyectos Europeos y la Intervención pa espedientes de fondos del Mecanismu de Recuperación y Resiliencia, amás d’adaptar los instrumentos d'ordenación de puestos de trabayu a los cambeos del decretu d'estructura orgánica de la Conseyería d'Educación, ente otros asuntos.