Categories Navigation

Categories Navigation

El neurociruxanu Ugur Türe va impartir mañana un cursu prácticu nel HUCA sobre una técnica qu’ameyora los resultaos de la ciruxía de tumores cerebrales

16/05/2022
  • Un centenar de pacientes con glioma van poder beneficiase d’esti procedimientu cada añu n’Asturies
  • 20 especialistes van asistir a esta actividá, entamada pol serviciu de Neurociruxía dientro del XXV congresu nacional de la especialidá que se celebra esta selmana n’Uviéu


Ugur Türe, médicu renomáu, director del Serviciu de Neurociruxía del Hospital Universitariu de Yeditepe (Estambul), va impartir mañana un cursu prácticu sobre una técnica de disección de la sustancia blanco del cerebru nel Hospital Universitariu Central d’Asturies (HUCA). Esti métodu, perfeccionáu nes últimes décades, ameyora los resultaos de les ciruxíes de tumores cerebrales, sobre manera d’aquelles que precisen que los pacientes queden espiertos.

La técnica fecha en cerebru de cadabre ye un estudiu anatómicu que dexa reconocer los fascículos onde ta dispuesto la sustancia blanco cerebral. Esa conocencia de la estructura tridimensional ye imprescindible pa un tratamientu quirúrxicu meyor de los tumores.

El profesor Türe va demostrar en qué consiste la preparación d’especímenes y la disección de fibres de sustancia blanco de la cara llateral del cerebru. De siguío, los asistentes van practicar pa garrar destreces baxo la supervisión de cinco de los mayores espertos nacionales na materia. El cursu ta limitáu a 20 especialistes.

Los neurociruxanos del HUCA operen cada añu alredor de 240 tumores cerebrales, de los qu’un centenar son gliomes. D’estos últimos, anualmente faise una decena col paciente espiertu.

Esti cursu, promovíu pol Serviciu de Neurociruxía del HUCA enmárcase nel XXV Congresu de la Sociedá Española de Neurociruxía que se va celebrar n’Uviéu dende mañana y hasta’l vienres, día 20.