• L'axenda urbana y rural tien cuatro oxetivos: xenerar actividá económica, caltener el patrimoniu, fomentar un modelu inclusivu y promover la tresferencia del conocimientu
• Los consistorios d'Ayer y Xixón, que xunto con Castropol yá tán ellaborando'l so propiu documentu, presentaron güei les sos llinies de trabayu

La Conseyería de Mediu Rural y Cohesión Territorial, que presentó güei les meyores na redacción de l'Axenda Urbana y Rural d'Asturies (AURA), animó a los conceyos a redactar el so propiu documentu y a collaborar nel proyectu autonómicu.

Esti nuevu marcu estratéxicu diose a conocer güei n'Uviéu, na xornada Construyendo l'axenda urbana y rural d'Asturies, na que per parte de l'Alministración central participó la subdirectora xeneral de Polítiques Urbanes del Ministeriu de Tresportes, Movilidá y Axenda Urbana, Ángela de la Cruz, y per parte del Principáu, el conseyeru de Mediu Rural y Cohesión Territorial, Alejandro Calvo, y la directora xeneral d'Ordenación del Territoriu y Urbanismu, Sonia Puente Landázuri. Amás, asistieron la presidenta de la Federación Asturiana de Conceyos (FACC), Cecilia Pérez, y representantes de los conceyos d'Ayer y Xixón, los dos conceyos que, xunto con Castropol, tán redactando'l so propiu documentu. Estos dos conceyos espunxeron les llinies nes que tán trabayando.

El Principáu ponse a disposición de los conceyos pa facilita-yos la metodoloxía de trabayu diseñada pol Estáu, que pueden desenvolver de manera individual o como agrupaciones de conceyos, ensin necesidá de tramitación previa. Esta metodoloxía consiste en cinco fases: la ellaboración d'un diagnósticu, l'establecimientu d'un marcu estratéxicu, la creación d'un plan d'acción, l'establecimientu d'indicadores y la implementación de la mesma estratexa.

L'Executivu autonómicu treslladó a los representantes municipales dalgunes de les cuestiones que va recoyer AURA, la fueya de ruta que va permitir aplicar, a mediu y llargu plazu, polítiques empobinaes a la consecución de cuatro oxetivos estratéxicos: xenerar actividá económica, caltener el patrimoniu territorial, fomentar un modelu territorial inclusivu y promover la tresferencia de la conocencia. AURA va constituyir tamién un elementu diferenciador que va facilitar l'accesu a distintes llinies de financiamientu públicu.

La participación de los conceyos na construcción d'esti marcu estratéxicu resulta fundamental, yá que cada territoriu tendrá d'avanzar na so axenda municipal y participar, de forma coordinada, na autonómica. L'oxetivu d'estes acciones, que se desenvuelven de forma simultánea a nivel européu, estatal, rexonal y local ye territorializar les polítiques públiques alliniaes nun marcu común p'algamar la sostenibilidá a nivel mediuambiental, social y económica.

Con esti fin, el Gobiernu d'España aprobó va dos años un decálogu de propósitos que garanticen la cohesión territorial, la preservación del territoriu y l'adaptación a los nuevos retos dixitales y tecnolóxicos. Tratar de los siguientes diez puntos:

• Ordenar, protexer y caltener racionalmente el territoriu.
• Combatir la dispersión urbana y revitalizar les ciudaes.
• Prevenir y amenorgar l'impactu del cambéu climáticu.
• Realizar una xestión sostenible de los recursos.
• Favorecer la movilidá sostenible.
• Fomentar la cohesión social y la equidá.
• Impulsar la economía urbana.
• Garantizar l'accesu a la vivienda.
• Fomentar la innovación y ameyorar los preseos d'intervención y la gobernanza.