• Convócase tamién el Premiu Camaretá al Meyor Cantar, al que pueden presentase cantares n'asturianu o eonaviegu
• El plazu de presentación d’orixinales o candidatures a les ocho categoríes finaliza’l 16 de xunu.

La Conseyería de Cultura, Política Llingüística y Turismu fizo pública la convocatoria del 2022 de los siete gallardones qu'impulsa pa premiar a les meyores obres de la producción lliteraria escrita en llingua asturiana, correspondientes a les categoríes de Novela, Poesía, Ensayu, Lliteratura Infantil y Xuvenil, Cómic, Traducción y Narrativa moza.

De la mesma, convócase la decimocuarta edición del Premiu Camaretá al Meyor Cantar, nel que pueden participar cantares con lletra en llingua asturiana o eonaviegu difundíes al públicu a lo llargo del añu 2021 y hasta la fecha de la convocatoria d'esta edición.

El Boletín Oficial del Principáu d'Asturies publica güei les ocho convocatories, y tolos interesaos en participar van poder presentar los sos trabayos hasta'l próximu 16 de xunu. Estos gallardones súmense al premiu Nel Amaro de Teatru Profesional, convocáu a primeros de mayu.

La Dirección Xeneral de Política Llingüística destina un total de 45.000 euros a la dotación de los ocho gallardones, que l'añu pasáu incorporaron pela primer vez les distinciones a obres de Narrativa moza y a la meyor Traducción al asturianu. Les persones o empreses que resulten ganadores, amás del premiu en metálicu y del troféu correspondiente, van integrase nel circuitu cultural Autores nel Camín del año 2023 que se desenvuelve a lo llargo del territoriu asturianu.

Les convocatories pueden consultase nestes direcciones: 

Premiu Xosefa Xovellanos de Novela

https://cutt.ly/GHnBWA5

Premiu Xuan M.ª Acebal de Poesía

https://cutt.ly/lHnB04r

Premiu Máximo Fuertes Acevedo d’Ensayu

https://cutt.ly/YHnBLuZ

Premiu María Josefa Canellada de Lliteratura Infantil y Xuvenil

https://cutt.ly/QHn0rBl

Premiu Alfonso Iglesias de Cómic

https://cutt.ly/XHn11mw

Premiu Enriqueta González Rubín de Narrativa moza

https://cutt.ly/eHnBzct

Premiu Florina Alías a la Meyor traducción

https://cutt.ly/aHn0Wsd

Premiu Camaretá al Meyor Cantar

https://cutt.ly/xHn0fFe