• La rede de centros públicos y privaos conmemora güei’l día internacional dedicáu a estos equipamientos con más de 80 actividaes que van allargase hasta’l fin de selmana

Los museos asturianos recibieron l’añu pasáu 588.815 visitantes, un 72 % más que nel 2020. Les restricciones sanitaries impuestes pola pandemia del coronavirus condicionaron de manera importante’l volume d’entraes nos equipamientos.

Destaquen, por exemplu, les cifres del Muséu Xurásicu, que recibió nel 2021 127.320 persones, mentes que’l Muséu de Belles Artes atraxo 75.170. Pela so parte, el de la Ilesia acoyó 72.414; el del Pueblu d’Asturies, 63.545; y el muséu arqueolóxicu de La Campa Torres, 59.903.

La rede de centros públicos y privaos conmemora güei’l Día Internacional de los Museos con una programación qu’incluye más de 80 actividaes per toa Asturies y que va allargase hasta’l fin de selmana que vien. Talleres, visites guiaes, alcuentros, esposiciones o presentaciones de llibros son dalgunes de les propuestes diseñaes pa tolos públicos.

Los museos son centros de referencia del texíu cultural asturiano, como demuestren los rexistros de visites anuales, y ufierten un programa ampliu d’esposiciones y actividaes a lo llargo del añu. Tamién s’afianzaron como atractivos turísticos potentes.

Los equipamientos que dependen de la Conseyería de Cultura, Política Llingüística y Turismu ellaboraron un cartel d’actividaes que tien como protagonistes a les families y a lo más mozo.

La programación del Día Internacional de los Museos pue consultase nesti enllaz: https://cutt.ly/aHEr4Im