​​​​​​​

• Esti órganu va impulsar dos encuestes nel branu: una empobinada a les entidaes y otra a voluntarios
• Actualmente hai rexistraes 131 entidaes nesti campu, con 8.158 persones apuntaes

La Conseyería de Derechos Sociales y Bienestar punxo en marcha l’Observatoriu Asturianu del Voluntariáu pa evaluar la situación del sector na comunidá y tener una radiografía exacta que dexe conocer les sos debilidaes y fortaleces.

La conseyera Melania Álvarez y representantes de la Plataforma del Voluntariáu del Principáu tuvieron esta tarde una reunión onde dieron pasos nuevos depués de la constitución d’esti órganu, que dispón de 20.000 euros del Gobiernu d’Asturies pa ponese en marcha.

El Rexistru d’Entidaes de Voluntariáu del Principáu reflexa qu’actualmente operen n’Asturies 131 entidaes que faen llabores de voluntariáu, con un total de 8.158 persones apuntaes.

La puesta en marcha d’esti órganu ye’l puntu de partida pa la definición d’un paquete de midíes concretes pa desenvolver nel periodu 2023/2024. L’oxetivu del observatoriu, que va trabayar en collaboración col estatal, ye dar visibilidá y respaldu al voluntariáu, sofitando los sos esfuercios y reconociendo la so contribución a los fines de l’Axenda 2030. Con esti fin, el branu que vien va llanzar dos encuestes, una empobinada a les entidaes y otra a persones voluntaries; y va facer un inventariu d’actividaes.

La consulta dirixida a les organizaciones va analizar, ente otres cuestiones, la so distribución nel territoriu, la financiación, el númberu de persones emplegaes y l’ámbitu d’actividá. Al empar, la encuesta empobinada a les persones voluntaries va afondar nel perfil sociodemográficu, nos medios pelos qu’acceden al voluntariáu, nes sos motivaciones y nel tiempu dedicáu a esti llabor.

Los resultaos d’estes investigaciones van publicase y presentase’l 1 d’avientu, Día Internacional del Voluntariáu.