• El documentu, qu’ellaboren les Conseyeríes d’Industria y Facienda, Faen y l’Idepa, va incorporase nel plan nacional que l’Executivu central va unviar a la UE 
• Les propuestes del Gobiernu d’Asturies van remitise nos plazos fixaos pol Institutu de Transición Xusta y la Comisión Europea
• El despliegue de la enerxía renovable y de la cadena de valor asociada, la rehabilitación medioambiental y el sofitu a les  inversiones de pymes, ente les llinies prioritaries
   

El Gobiernu d’Asturies va unviar la selmana que vien al Institutu de Transición Xusta (ITX) la programación del Fondu de Transición Xusta pal periodu 2021-2027, el documentu que recueye les prioridaes y actuaciones previstes pol Principáu pa impulsar la tresformación del texíu productivo y amenorgar l’impactu del zarru de la minería y de les centrales térmiques. D’esta manera, el Principáu va cumplir los plazos establecíos pol Executivu central y la Comisión Europea, que fixen el 26 de mayu como fecha tope pal unviu del testu al ITX.

El documentu remátase nun grupu de trabayu multidisciplinar onde participen dos direcciones xenerales de la Conseyería d’Industria, Emplegu y Promoción Económica (Enerxía, Minería y Reactivación, y Industria), la Dirección Xeneral d’Asuntos Europeos y la Oficina de Proyectos Europeos, dambes dependientes de la Conseyería de Facienda, l’Idepa y la Fundación Asturiana de la Enerxía (Faen).

El programa asturianu va incorporase nel Plan Territorial de Transición Xusta d’España, onde se trabaya dende va meses, xunto a los documentos de los demás territorios beneficiarios del Fondu de Transición Xusta. El plan completu ha unviase a la Comisión Europea.

El conseyeru d’Industria, Emplegu y Promoción Económica, Enrique Fernández, esplicó que’l grupu de trabayu ta rematando’l documentu. “Yá lo diximos colos fondos europeos y agora dicímoslo colos fondos de transición xusta: Asturies nun ta perdiendo nengún tren nin lu va perder”, sorrayó.

La programación que se ta diseñando presenta seis prioridaes d’actuación:

-    Tresformación ecolóxica de la industria, la movilidá sostenible, la economía circular y la eficiencia enerxética.
-    Impulsu a la cadena de valor de la enerxía renovable, l’autoconsumu, l’almacenamientu enerxéticu y l’hidróxenu renovable.
-    Impulsu a pymes y proyectos empresariales tractores pa la diversificación económica de los territorios.
-    Fomentu de la I+D+i, la integración de les TIC y la tresformación dixital.
-    Rehabilitación ambiental; caltenimientu de la naturaleza, biodiversidá y ecosistemes; promoción del patrimoniu históricu, cultural y industrial; y fomentu del turismu sostenible.
-    Impulsu a les infraestructures sociales, la economía social y les iniciatives de formación y cualificación.

El Plan Territorial de Transición Xusta d’España ye’l documentu que define y articula les acciones que van financiase pol Fondu de Transición Xusta, el primer pegollu del Mecanismu pa una Transición Xusta, impulsáu pola Comisión Europea y ún de los instrumentos financieros pa sofitar a los territorios más afectaos pol tránsitu a la neutralidá climática. Dótase con 17.500 millones, de los qu’alredor de 800 concediéronse a España.

Amás d’Asturies, Llión, Palencia, A Coruña, Teruel, Almería, Cádiz, Córdoba y la zona de transición xusta d’Alcúdia (Mallorca) son los territorios españoles que van recibir apoyu al traviés d’esti mecanismu. El Principáu va recibir la cantidá más grande: 263 millones. 
 

Declaraciones del conseyeru d'Industria, Empléu y Promoción Económica, Enrique Fernández, Enrique Fernández (mp3: 1,78 Mb)