Categories Navigation

Categories Navigation

Cuatro empreses moces asturianes algamen un gallardón nel programa nacional Ances Open Innovation

19/05/2022

  • Les compañíes emerxentes Bym Ingema, Táctica Desarrollo industrial, H2Vector y Simbiosys foron premiaes poles sos soluciones a los retos propuestos por compañíes tractores  

Cuatro empreses asturianes foron distinguíes nel programa nacional Ances Open Innovation, qu’esta mañana falló los sos premios. Les compañíes emerxentes (startups) Bym Ingema, Táctica Desarrollo Industrial, H2Vector y Simbiosys resultaron ganadores poles sos propuestes pa los retos de les firmes Aceites Maeva, Capital Energy Quantum, Indertec y Mapfre.

Nel eventu final participaron 25 startups ente les que s’alcontraben siete d’Asturies. Amás de les yá mentaes, tamién llegaron a la final UpIntelligence, 2Chain Blockchain Tecnología, Energy Technologies y ABAMobile Solutions.

Ances Open Innovation ye un programa de tracción al mercáu d’empreses innovadores impulsáu pola Asociación Nacional de Centros Europeos d’Empreses y Innovación, baxo la coordinación de Cristina Fanjul, vicepresidenta de la entidá y directora del CEEI Asturies, qu’intervieno nel taller d’apertura.

Les grandes empreses tractores participantes, ente les qu’hai una con sede n’Asturies, son Aceites Maeva, BSH Electrodomésticos España, Cantabria Labs, Capital Energy Quantum, GSP, Indertec, Mapfre, Mundiplan y Soltec. 

Cada compañía recibe un premiu de 500 euros, pero la parte más importante del gallardón ye la posibilidá de collaborar cola firma tractora pa la que se presenta una solución al so retu tecnolóxicu. 

Estos son los retos onde participaron les empreses asturianes ganadores nesta cuarta edición de los premios nacionales:

  • Bym Ingema. Alternativa al bañu d’agua caliente pa detección de fugues n’aerosol llibre de gas propelente, pa la empresa Aceites Maeva.
  • Táctica Desarrollo Industrial. Incorporar tecnoloxíes punteres y disruptives qu’ameyoren los procesos de Capital Energy al traviés de soluciones tecnolóxiques y/o de dixitalización aplicaes a la industria 4.0, O&M eólicu y fotovoltaicu, soluciones pal veceru final y/o movilidá sostenible.
  • H2Vector. Desenvolvimientu de tecnoloxíes d’hidróxenu y captura de CO2, amás d’almacenamientu n’instalaciones industriales de tamañu pequeñu. Sistemes o soluciones financieres p’acometer estes inversiones, pa la empresa Indertec.
  • Simbiosys. Ufiertar al usuariu de Mapfre una propuesta de movilidá, con sinerxes ente concesionarios y aseguradores, que facilite convertir los espacios físicos (oficines, puntos de venta, talleres…) n’elementos relevantes de la movilidá urbana, conectándolos con capacidaes tecnolóxiques y dixitales.

Pa más información: web www.ancesopeninnovation.com