Categories Navigation

Categories Navigation

El Principáu convoca ayudes por valor de dos millones p’ameyorar l’abastecimientu d’agua en conceyos de menos de 20.000 habitantes

19/05/2022
  • Estes subvenciones, financiaes pol Mecanismu de Recuperación y Resiliencia, pueden solicitase a lo llargo d’un mes

 

El Boletín Oficial del Principáu d’Asturies (Bopa) publica güei la convocatoria de subvenciones empobinaes a ameyorar l’abastecimientu y menguar perdes nes redes de distribución d’agua de conceyos de menos de 20.000 habitantes. Les ayudes, financiaes con fondos procedentes del Mecanismu de Recuperación y Resiliencia de la Unión Europea, tienen calter plurianual y xuben a los dos millones.

L’oxetivu ye optimizar los sistemes d’abastecimientu cola mira de menguar les perdes d’agua, maximizar l’aforru y aumentar la garantía de calidá y cantidá del suministru. Amás, van potenciase soluciones innovadores.

Asina, van subvencionase actuaciones qu’ameyoren la eficiencia de los sistemes de saniamientu, y la reparación y meyora de los depósitos y les instalaciones de potabilización, pa que tengan un efectu que se traduza nun aforru d’agua y enerxía. Los proyectos han incorporar sistemes de midida que dexen verificar la mengua de perdes d’agua y aplicar criterios d’economía circular, como l’usu de material reciclao pa que polo menos el 70 % del residuu de construcción y demolición non peligroso vuelva usase, reciclase o recuperase na mesma obra.

La cantidá máxima de les ayudes va ser del 80 % de los gastos subvencionables y van tramitase en réxime de concurrencia competitiva. Ente los criterios de valoración inclúyese l’aforru d’agua, la mengua d’emisiones de gas d’efectu ivernaderu o la contribución a los oxetivos del retu demográficu.

Les entidaes locales van tener la posibilidá de proponer más d’una actuación, anque nun van poder recibir más de 80.000 euros. El plazu pa la presentación de solicitúes ye d’un mes dende güei, fecha de la publicación de la convocatoria.

La Viceconseyería de Mediu Ambiente y Cambéu Climáticu, que va ufiertar la collaboración a los Conceyos pa la redacción de los proyectos constructivos, punxo a disposición de los Conceyos un teléfonu, un corréu electrónicu y una llista de preguntes y respuestes más frecuentes, accesible dende la web de Mediu Ambiente del Gobiernu del Principáu, cola mira de solventar les duldes que puedan surdir nel procesu de solicitú.

Primero de la ellaboración de les bases reguladores de la convocatoria, el Principáu unvió a los Conceyos un formulariu de manifestación d’interés que dexó conocer les prioridaes y definir con más precisión el conteníu y destín específicu de les ayudes.

La convocatoria pue consultase nesti enllaz: https://cutt.ly/MHUBPFT