Categories Navigation

Categories Navigation

El Gobiernu d’Asturies destina 215.000 euros a ayudes pa favorecer la movilidá internacional del alumnáu universitario

20/05/2022
  • La Conseyería de Ciencia va complementar con hasta 1.800 euros la estancia n’universidaes estranxeres d’estudiantes con un nivel de renta menor
  • El Principáu abre tamién una convocatoria de beques pa cursar estudios de máster oficial na Universidá d’Uviéu y nel centru asociáu de la Uned

 

 

 

El Gobiernu d’Asturies impulsa la movilidá internacional del alumnáu universitario con una convocatoria d’ayudes de 215.000 euros dientro del programa Erasmus+. La Conseyería de Ciencia, Innovación y Universidá quier facilitar qu’estudiantes con un nivel de renta menor puedan cursar estudios nel estranxeru.

 

Estes ayudes, que contemplen estancies d’un mínimu de trés meses y un máximu d’un cursu nuna universidá estranxera, son complementaries a les que yá reciban les persones beneficiaries d’un programa de movilidá.  La cantidá ye de 200 euros por cada mes de movilidá,  hasta un máximu de 1.800 euros pola ayuda completa.

 

Pueden presentase a esta convocatoria estudiantes matriculaos nel cursu 2022-2023 na Universidá de Uviéu, nel centru asociáu de la Universidá Nacional d’Educación a Distancia (Uned) n’Asturies y nos centros qu’imparten enseñances artístiques superiores.


L’añu pasáu, esta convocatoria d’ayudes complementaries a la movilidá benefició a más de 130 mozos y moces, que los más d’ellos recibieron la subvención máxima, 1.800 euros por persona, pa estudiar nun centru universitariu estranxeru.

 

Otramiente, el Principáu acaba d’abrir una convocatoria de beques pa cursar un máster oficial tanto na Universidá d’Uviéu como na Uned. Pa estes ayudes destínense 50.000 euros, con una cantidá de 2.000 por beneficiariu, siempre que se matricule de polo menos 60 creitos ECTS nel cursu académicu que vien.

 

Dambes convocatories salieron publicaes güei nel Boletín Oficial del Principáu (Bopa) y pueden consultase nestos enllaces: https://cutt.ly/0HP80Ln y https://cutt.ly/2HP4bkg

 

Les persones interesaes tienen 30 díes hábiles pa formalizar la solicitú.