Categories Navigation

Categories Navigation

El Plan Director de Saniamientu y Depuración d’Agua supera la tramitación ambiental

20/05/2022
  • La CAMA informa favorablemente’l proyectu de tresformación de la central térmica de La Perea pa la valorización de biomasa y combustible sólido recuperao

 

 

La Comisión d’Asuntos Medioambientales (CAMA) emitió güei informe favorable sobre la declaración ambiental estratéxica del Plan Director de Saniamientu y Depuración d’Agua del Principáu, que tien como oxetivu principal garantizar la recoyida y tratamientu correctu del agua residual urbano. Tratar d’avanzar na eliminación de los vertíos directos ensin depuración qu’existen anguaño y asegurar la sostenibilidá económica y ambiental de tolos sistemes de saniamientu y depuración colectivos. Esta autorización ye’l pasu previu a la so aprobación pol Conseyu de Gobiernu.

 

El documentu, qu’afita la planificación hasta’l 2030 y prevé una inversión de 478 millones, quier dar solución al serviciu de depuración del agua residual de toles aglomeraciones urbanes y d’aquelles rurales con una población que supere los 100 habitantes. Igualmente, aspira a eliminar tolos vertíos directos procedentes de redes de saniamientu colectives de titularidá municipal al dominiu públicu hidráulicu. Pa eso, van desenvolvese munches actuaciones al traviés de 286 midíes, les más d’elles (248) incluyíes nel programa d’infraestructures y les otres, nel programa de xestión.

 

Otra manera, la CAMA tamién informó favorablemente sobre la declaración d’impactu ambiental del proyectu de tresformación de la central térmica de La Perea, en Mieres, col qu’Hunosa quier tresformar la instalación actual, onde se consume carbón y material procedente d’escombreres, pa la valorización de biomasa y combustible sólido recuperao. Prevése que’l combustible, que va proceder prioritariamente de Coxersa, suponga hasta un 25 % n’enerxía total de mezcla.

 

La comisión tamién emitió informe positivu sobre les declaraciones d’impactu ambiental que determinen la viabilidá de proyectos de llinies aérees en Casu, Teberga y Quirós, lo que va ayudar a ameyorar la calidá del suministru d’enerxía eléctrico nestos conceyos; y sobre un proyectu d’ArcelorMittal de cambéu de la llinia de galvanizáu na factoría d’Avilés, que va dexar fabricar un productu nuevu que va ameyorar la resistencia a la corrosión de les bobines d’aceru.

 

El director xeneral de Calidá Ambiental y Cambéu Climáticu, Pablo Álvarez Cabrero, presidió la xunta de la comisión, a la que tamién asistieron los directores xenerales del Agua, Vanesa Mateo, y de Desenvolvimientu Rural y Agroalimentación, Begoña López; los directores xenerales de Tresportes y Movilidá, José Manuel Caldevilla; de Seguranza y Estratexa Dixital, Javier Fernández; d’Alministración Local, Manuel Calvo, y d’Infraestructures Rurales y Montes, Fernando Prendes, amás del director de l’Axencia de Seguranza Alimentaria, Sanidá Ambiental y Consumu, José Ignacio Altolaguirre.