Categories Navigation

Categories Navigation

El Sespa amplía’l plan de choque de llistes d’espera y prevé realizar 6.500 ciruxíes y 42.000 consultes vespertines hasta mayu del 2023

23/05/2022
  • La demoranza media pa una operación caltiénse en 89 díes a pesar del aumentu de la ocupación hospitalaria, los contaxos de los profesionales pola covid y les fiestes de Selmana Santa
  • L’actividá de consultes ameyora un 18 % n’abril y los tiempos d’espera mengüen en 10 díes al respective del zarru del 2021
  • El númberu de resonancies magnétiques equipárase yá a los rexistros anteriores a la pandemia

El Serviciu de Salú del Principáu (Sespa) refuerza’l plan de choque pa menguar les llistes d’espera quirúrxiques ampliándolu a más consultes y pruebes diagnóstiques. El Boletín Oficial del Principáu (Bopa) publica güei la segunda fase d’estos programes especiales de demoranza, con una vixencia d’un añu, a los que l’Executivu destina 1,8 millones.

Hasta mayu del 2023, esta fase nueva del plan va dexar realizar peles tardes más de 42.000 consultes, qu’incluyen especialidaes non contemplaes primero, como anestesia (tratamientu del dolor), anxología y ciruxía vascular, xeriatría, oncoloxía médica, neurociruxía, psiquiatría, ciruxía pediátrica y pediatría. Nesti periodu van efectuase más de 19.600 pruebes diagnóstiques adicionales, incluyíes técniques de neurofisioloxía clínica y d’anatomía patolóxica. Amás, van programase 6.520 ciruxíes n’horariu vespertín.

Los hospitales de la rede asturiana realizaron na primer fase del plan de choque, que va del 20 de setiembre del 2021 al 31 d’abril d’anguaño, 3.235 operaciones, de les que 246 efectuáronse’l mes pasáu, nun contestu d’alta incidencia de la covid na comunidá.



Ocupación alta por covid

La demoranza media pa una intervención quirúrxica n’abril caltiénse en 89 díes, a pesar de la ocupación tan alta de cames pola covid y del contaxu de 1.463 profesionales (el 7,45 % de la plantiya), qu’estorbó en momentos puntuales l’abordaxe de les ciruxíes programaes. L’actividá tamién se vio condicionada por un menor númberu de díes hábiles por cuenta de la Selmana Santa, de manera qu’a la fin del mes pasáu quedaben 22.011 ciruxíes pendientes.

El Sespa entainó nes intervenciones de pacientes con esperes de más de 180 díes, colo que sigue baxando’l númberu de persones nestes circunstancies.



Consultes y pruebes

N’abril, los especialistes hospitalarios atendieron 137.715 consultes, un 18 % más qu’al zarrar 2021. La demoranza media pa una primer consulta ameyora en 10 díes al respective d’avientu, al asitiase en 69 díes.

De xineru a abril, baxó la demoranza media na mayoría de les especialidaes. Asina, nel casu d’oftalmoloxía, cardioloxía y ciruxía vascular amenorgó en 33, 23 y 21 díes, respectivamente. Nel últimu mes, uroloxía, ciruxía torácica y xenética menguaron en 5 díes y cardioloxía, en 3.

Tocante a les pruebes de diagnósticu, n’abril practicáronse 31.514, de les que 4.398 foron resonancies, una cifra asemeyada a los rexistros anteriores a la pandemia. L’actividá aumentó un 16,7 % y les demorances medies pa una mamografía, colonoscopia y ecografía amenorgaron en 7, 5 y 4 díes, respectivamente, en comparanza col zarru del 2021.