• Los colectivos y asociaciones que quieran entamar batíes pa la recoyida de basura yá pueden pidir el patrociniu del consorciu al traviés de los Conceyos
• Como novedá, anguaño ufiértase un taller de sensibilización sobre’l microplásticu empobináu a públicu familiar

El Consorciu pa la Xestión del Residuu Sólido d’Asturies (Coxersa) pon en marcha un añu más la campaña d’apoyu a la llimpieza voluntaria n’espacios naturales, qu’implica a 42 conceyos. Los colectivos y asociaciones interesaos n’entamar batíes pa la retirada de basura yá pueden pidir, al traviés de los Conceyos, el patrociniu del consorciu, qu’impulsa esta iniciativa dende’l 2013.

Como novedá p’anguaño, Coxersa ufierta a los participantes una actividá empobinada al públicu familiar. Trátase d’un taller sobre los efectos del microplásticu nel mediu ambiente, al traviés del xuegu y la investigación. La solicitú pa esta acción ta disponible na páxina web de la entidá.

L’oxetivu d’esti programa ye sofitar a los Conceyos na llucha contra’l residuu acumulao en zones naturales d’usu públicu y na sensibilización de la ciudadanía. Pa eso, el consorciu proporciona dellos materiales y recursos (bolses, contenedores, tresporte y tratamientu del residuu, ente otros) a los colectivos que s’organicen al traviés de los Conceyos.

Ente les zones que pueden ser oxetu de les llimpieces patrocinaes atópense les siendes verdes y caminos n’espacios naturales, los merenderos y árees d’espardimientu n’espacios naturales, los calces y puntos de desembocadura de los ríos, les zones de llenes ivernales o de riaes ocasionales, amás de les dunes y los requexos de les playes a los que nun tien accesu la maquinaria rodao de llimpieza habitual.

Los Conceyos participantes na campaña del 2022 son estos: Ayer, Avilés, Bual, Cabrales, Cabranes, Candamu, Cangues d’Onís, Cangas del Narcea, Carreño, Casu, Castrillón, Castropol, Cuaña, Colunga, Corvera, El Franco, Xixón, Gozón, Ibias, Ḷḷena, Llanes, Mieres, Nava, Navia, Noreña, Uviéu, Parres, El Valle Baju de Peñamellera, Piloña, Ponga, Ribeseya, Riosa, Salas, Santu Adrianu, Siero, Sotu’l Barcu, Tapia, Tinéu, Valdés, A Veiga, Villaviciosa y Villayón.