Categories Navigation

Categories Navigation

Les campañes de saniamientu ganaderu llogren la declaración d’Asturies como zona llibre de tuberculosis bovina

23/05/2022
  • Estos programes ayudaron a menguar perdes nes esplotaciones, amenorgar riesgos pa la salú pública y aumentar les garantíes sanitaries na comercialización d’animales
  • L’añu pasáu fixéronse controles en 14.680 granxes: 13.773 de bovino, 675 d’ovino-caprino y 232 de porcino


Les campañes de saniamientu ganaderu que se faen dende va más de 40 años llograron la declaración d’Asturies como zona llibre de tuberculosis bovina. Esta ye una de les conclusiones más destacaes de la memoria anual del 2021, que recueye les midíes aplicaes pa lluchar contra les enfermedaes qu’afecten a estos animales. 

Les actuaciones que se faen nestos programes son perimportantes y permitieron que’l Principáu seya yá zona oficialmente indemne de leucosis bovina enzoótica, brucelosis bovina, brucelosis ovina y caprina, y llibre de perineumonía contaxosa bovina y de tuberculosis. 

Esta condición dexa menguar les perdes económiques orixinaes por esta clas d’enfermedaes, amenorgar los riesgos pa la salú pública pola baxada de la incidencia de tuberculosis y brucelosis n’humanos, y aumentar les posibilidaes de comercialización nos mercaos de ganáu con garantía sanitaria.

La Conseyería de Mediu Rural y Cohesión Territorial fixo nel 2021 controles en 14.680 esplotaciones: 13.773 de bovino, 675 d’ovino-caprino y 232 de porcino. Nes ganaderíes de lo bovino fixéronse exámenes de tuberculosis a 365.953 reses, de brucelosis a 48.199, de vixilancia de la leucosis enzoótica a 3.677 y de perineumonía a 16.181. Nes d’ovino y caprino fixéronse controles de brucelosis a 4.928 animales.

Amás, nel casu del ganáu porcino, incluyíos los xabalinos, executáronse los programes de vixilancia serolóxica de peste porcina clásica y africana y de llucha, control y eliminación de la enfermedá d’Aujeszky. Como complementu a estes campañes, el Serviciu de Sanidá Animal tamién fixo controles de tuberculosis a 287 exemplares de fauna montés, como xabalinos, melandros, venaos, gamos o corcios.

Anguaño actualizóse la normativa que rixe la campaña de saniamientu ganaderu p’adaptar el procedimientu a la declaración d’Asturies como zona llibre de tuberculosis bovina y incorporar la calificación frente a la tuberculosis caprina. 

La memoria de la campaña de saniamientu ganaderu del 2021 pue consultase nesti enllaz:  https://cutt.ly/IHPIEEL