Categories Navigation

Categories Navigation

El Principáu incorpora al sistema educativu a dos auxiliares de conversación d’ucranianu pa centros d’Uviéu y Xixón

23/05/2022
  • El ministerio asigna a estí personal xeres d’acompañamientu psicolóxicu y social al alumnáu d’ incorporación recién a les aules asturianes

El Principáu acaba d'incorporar al sistema educativu a dos auxiliares de conversación en llingua ucraniana que van realizar xeres d'acompañamientu psicolóxicu y social del alumnáu procedente del país invadíu por Rusia. En concreto, van collaborar en xeres de mediación llingüística, tanto pa cuestiones académiques como d'orientación, y siempre van tar nes aules acompañaos por un docente.

Los dos auxiliares van emprestar sofitu nos colexos de La Corredoria y Germán Fernández Ramos, d'Uviéu, y La Escuelona y el IES La Llaboral, en Xixón. Estos cuatro centros públicos tienen escolarizaos nestos momentos a 23 estudiantes ucranianos.
Dambos auxiliares van percibir una ayuda mensual de 700 euros, en conceptu de dieta de mantención y agospiamientu, por una xornada de 12 hores selmanales de collaboración nos centros escolares.

Esti refuerzu de personal pa l'atención del alumnáu ucranianu forma parte d'una convocatoria llanzada pol Ministeriu d'Educación y Formación Profesional, que pretendía distribuyir en total 200 auxiliares de conversación ente les comunidaes. La repartida realizóse en función del alumnáu procedente d'Ucrania qu'acaba d'incorporase al sistema educativu español.

Tanto la selección como la posterior asignación d’estos mediadores correspondió al propiu ministeriu. En principiu, el so contratu va tar a valir dende'l 1 de mayu hasta'l 31 d'avientu, cola escepción de les vacaciones escolares de xunetu y agostu.

El Gobiernu d'Asturies, pela so parte, yá punxo en marcha midíes de refuerzu de los recursos destinaos a ameyorar la incorporación tardía del alumnáu cuando detectó la llegada progresiva d'estudiantes forzaos a migrar de resultes del conflictu bélicu. Nestos momentos, los centros cunten con 275 alumnos d'estes característiques matriculaos.

La prioridá de la conseyería ye realizar una escolarización normalizada, na que l'alumnáu cunte con tolos servicios del sistema públicu y que tenga a la so disposición recursos que faciliten la so integración. Ente les principales midíes adoptaes, atópase l'apertura d'un aula d'inmersión llingüística en Xixón y la creación d'un espaciu específicu dedicáu a estos estudiantes dientro de la páxina web de les aules d'inmersión llingüística, denominada Acoyida, que puede consultase nel siguiente enllaz: https://cutt.ly/8DHZhOE

Per otra parte, previóse que los equipos docentes de les aules d'inmersión llingüística realicen semanalmente visites a los centros con mayor matrícula de menores abelugaos pa emprestar asesoramientu. De manera complementaria, habilitóse un corréu electrónicu de la mesma conseyería dende'l que se respuende a toles duldes que puedan surdir nel procesu d'acoyida.