Categories Navigation

Categories Navigation

Asturies va exhibir nel Festival Intercélticu de Lorient la riqueza anovada de la so cultura tradicional como rexón convidada d’honor

23/05/2022
  • El conciertu d’apertura, a cargu de Mapi Quintana, va facer homenaxe al desapaecíu Elías García, que la so banda Llan de Cubel va actuar tamién nel certame
  • La Consejería de Cultura, Política Llingüística y Turismo va invertir 200.000 euros nel Pabellón d’Asturies na programación d’una decena de conciertos, actividaes lliteraries y la esposición llabor, de Ricardo Villoria

Asturies va ser la rexón convidada d’honor na 51.er edición del Festival Intercélticu de Lorient y va mostrar nel gran escaparate de la cultura celta la riqueza anovada de la cultura tradicional. La programación impulsada dende la Conseyería de Cultura, Política Llingüística y Turismu va mostrar nel certame bretón propuestes artístiques innovadores que beben de la tradición y reinterprétenla al traviés de la fusión y usu de formatos nuevos.

El Principáu va destinar una inversión de 200.000 euros al Pabellón d’Asturies, onde se va desenvolver la programación especial del 6 al 14 d'agostu pola mor de la so escoyeta como convidáu d’honor. El cartelu va incluyir una decena de conciertos, actividaes lliteraries y una esposición diseñada pa la ocasión pol artista llavianés Ricardo Villoria.

La nueche d’apertura del festival, el sábadu 6 d’agostu, va tener como protagonista a la música asturiana, que va facer homenaxe al desapaecíu Elías García. L’espectáculu Música pa tornar páxaros, dirixíu por Mapi Quintana, va xubir al escenariu de Le Théâtre pa recordar al músicu asturianu, fallecíu nel 2019, con un repertoriu compuestu a costafecha pa la cita con Lorient.

Amás, pel escenariu del pabellón asturianu van desfilar ente’l 6 y el 14 d’agostu nueve artistes y bandes asturianes que van ufiertar un abanicu ampliu de propuestes que, encontaes nes melodíes y cantares tradicionales, incorporen influencies d’otros soníos y cultures. Dende la música electrónica hasta’l reggae o los ritmos afrollatinos, la fusión marca un cartel del que van formar parte Llevólu’l Sumiciu, Eva Tejedor & Les Pandereteres, ¿Aú?, Rubén Alba y Nel de Pumea, Algaire, Baxel, La Garrapiella, y Monteavaro, Muñalén & Rodrigues.

El Pabellón d’Asturies va cuntar con 375 m2 de superficie que van agospiar un escenariu y los medios técnicos pa les actuaciones musicales, mentes que’l backstage de los grupos va asitiase nun espaciu anexu. Asinamesmo, destaca nesta edición l’espaciu destináu a la gastronomía y a los productos asturianos, al cuntar con un restaurante que se va ver complementáu con una zona d’escanciáu de sidra asturiana, un estand de Alimentos del Paraísu y un estand d’información turística. Pa ello, el pabellón asturianu va disponer na so contorna de seis carpes y dos bungalows.

Xunto a la programación especial de la edición 2022, la organización del certame cuntó amás con artistes asturianos de sonadía dientro de la programación oficial. Ye’l casu de Llan de Cubel, ún de los referentes imprescindibles del folk asturianu –al que pertenecía’l músicu Elías García–, que van ufiertar un conciertu na llamada Gran nueche d’Asturies, xunto al gaiteru José Ángel Hevia.

Tamién l’axitador folclóricu Rodrigo Cuevas se suma anguaño al elencu d'artistes que van a la llamada del festival bretón xunto a José Manuel Tejedor, Silvia Quesada, Proyecto Breizh Asturies, Cerezal, L-R, Muga, Javier Menéndez, Fabián Fernández, la Banda Gaitas Llacín y el grupu de baille Trebeyu.

Fernando Vázquez, Jaime Álvarez, Daniel Meré y Diego Lobo van ser los gaiteros asturianos participantes nel prestixosu troféu MacCrimmon.



Artes visuales y lliteratura

La esposición llabor, del artista Ricardo Villoria, va mostrar la so visión tan personal de la cultura que vivió dende neñu deconstruyéndola pa reconstruyila con una mirada más vanguardista y tresgresora cola que poder trespasar fronteres. Al traviés de distintos formatos, fotografía, indumentaria y audiovisual, Villoria reflexa de cerca la cultura asturiana pa somorguiar al espectador nel so pasáu, entendiendo’l so presente decadente y proyectando la busca d’un sitiu prometedor nel futuru.

La lliteratura tamién va tar presente na programación diseñada pa la cita con Lorient. Autores en llingua asturiana van participar en charles y meses redondes pa dar cuenta del momentu tan escepcional que traviesa la producción lliteraria n’asturianu.

El Festival Intercélticu de Lorient celebróse la primer vez na localidá bretona en 1971 coles mires de convertise nun gran puntu d’alcuentru de les llamaes naciones celtes. Les rexones participantes son, amás d’Asturies, Galicia, Irlanda, Escocia, Bretaña, Gales, Isla de Man y Cornualles. Dende l’añu 2000 foron incorporándose delles comunidaes con emigración celta como Estaos Uníos, Australia, Nueva Zelanda, Chile, Arxentina, México, Rumanía o Italia.

El certame bretón ye un referente de los festivales europeos. Dende va yá munches ediciones, cada añu axunta a más de 4.000 músicos y a alredor de 800.000 asistentes, lo que lu convierte nun gran escaparate con una importancia que va más allá del so valor musical y algama una repercusión cultural y turística bien relevante pa les rexones participantes.