​​​​​​​

• Derechos Sociales va disponer de dos zones dexaes pol Conceyu que sumen alredor de 6.500 metros cuadraos
• La intervención, que va executase con fondos europeos, va ayudar a fixar población nuna zona rural de presión turística elevada

El Gobiernu d’Asturies va construyir ente 20 y 25 viviendes de promoción pública p’arriendu nel centru de Colunga, en dos zones urbanes que sumen unos 6.500 metros cuadraos. La obra tien financiación de los fondos europeos del Mecanismu de Recuperación y Resiliencia (MMR).

La conseyera de Derechos Sociales y Bienestar, Melania Álvarez, y l’alcaldesa de Colunga, Sandra Cuesta, firmaron güei na Casa Conceyu’l conveniu pol que’l consistoriu dexa al Principáu dambes árees, allugaes na zona de La Posesión, a la vera de la urbanización El Jardín del Sueve, y pensaes pa usu residencial.

Melania Álvarez destacó qu’esta actuación nueva, que va ampliar el parque públicu rexonal –el segundu más grande d’España con cuasi 10.000 viviendes–, ye una muestra del apueste del Executivu autonómicu por fixar población nel mediu rural. Amás, sorrayó la importancia de promover vivienda pública p’arriendu nuna zona con una renta media de 77 euros al mes y una presión turística que xube los precios de los pisos.

“Una de les exes fundamentales de la nuestra política ye garantizar vivienda asequible y consideramos que la meyor fórmula pa llogralo ye disponer d’un parque públicu n’arriendu propiu, que se reparta per tol territoriu y se xestione de manera exemplar, potenciando edificaciones sostenibles y accesibles. Esta política ye, amás, un refuerzu pal sistema públicu de valor social”, manifestó la conseyera.

La cesión del terrén aprobóse nel plenu municipal nel mes de payares pasáu y ratificóse pol Conseyu de Gobiernu del Principáu n’abril. Con esti conveniu, el Conceyu va correr coles altes iniciales del suministru d’agua y va executar un vial d’accesu y aparcamientos, pa lo que va disponer de 337 y 300 metros cuadraos, respectivamente. Pela so parte, el Gobiernu d’Asturies comprométese a construyir el mayor númberu posible de viviendes de promoción pública y a dexar los baxos al consistoriu, que va destinalos a usu públicu.

Audios de la consejera de Derechos Sociales y Bienestar, Melania Álvarez (mp3 737 Kb)​​​​​​​