Categories Navigation

Categories Navigation

L’HUCA, pioneru n’implantar una técnica mínimamente invasiva pa consiguir biopsies ganglionares del mediastín ensin ingresu

23/05/2022
  • Alredor de 200 pacientes con patoloxíes hematolóxiques, cáncer de pulmón, tuberculosis y metástasis ganglionares d’otros tumores van poder beneficiase anualmente d’esti procedimientu

La Unidá de Neumoloxía Intervencionista del Área del Pulmón del Hospital Universitariu Central d’Asturies (HUCA) foi pionera n’usar, nun procedimientu namás y de manera ambulatoria, la ecobroncoscopia llinial (EBUS-L) y la crioterapia pa consiguir biopsies ganglionares del mediastín, que dexen facer diagnósticos más precisos de tumores de pulmón, linfomes, enfermedaes granulomatoses como la tuberculosis y metástasis d’otros cáncanos.

Los neumólogos intervencionistes del centru sanitariu foron quién a acceder al traviés de los bronquios al mediastín, un compartimentu asitiáu ente los pulmones y detrás del esternón, que contién ganglios, arteries y venes, pa sacar les muestres histolóxiques ensin usar procedimientos quirúrxicos invasivos que necesiten ingresu hospitalariu.

Esta técnica combinada, denominada CRIO-EBUS (criobiopsia tresbronquial mediastínica guiada por ultrasoníu endobronquial) fai qu’entaíne’l diagnósticu y aforra posibles complicaciones postoperatories.

Dende’l 8 de febreru, los neumólogos intervencionistes del HUCA usaron esta técnica en 16 pacientes. En tolos casos diagnosticóse la enfermedá y el so estadiu ensin falta de facer otros procedimientos más invasivos.

Una revista científica tan prestixosa como Archivos de Bronconeumología, con un factor d’impactu de 4.872 y asitiada nel cuartil Q2, aceptó la publicación d’un artículu sobre los primeros cuatro pacientes asturianos con quien s’usó esta técnica novedosa.

L’Área del Pulmón del HUCA calcula qu’alredor de 200 pacientes con enfermedaes hematolóxiques, granulomatosis, tumores de pulmón y metástasis podríen beneficiase al añu d’esti procedimientu mínimamente invasivu.