Categories Navigation

Categories Navigation

El Principáu sofita’l relevu xeneracional y la puesta en marcha d’esplotaciones agraries nueves con más de 17 millones

23/05/2022
  • La convocatoria nueva d’ayudes a la incorporación de xente mozo a les actividaes del campu incorpora una xuba de la cantidá máxima, que pasa de 50.000 a 70.000 euros


El Gobiernu d’Asturies destina más de 17 millones a favorecer el relevu xeneracional y la puesta en marcha d’esplotaciones agraries nueves. La resolución de les ayudes empobinaes a la creación d’empreses por parte de xente mozo agricultor, publicada güei nel Boletín Oficial del Principáu (Bopa), recueye qu’esta cantidá inicial podría ampliase con otros 4 millones si fore menester pol volume de solicitúes.

Ente les novedaes principales d’esta llinia de subvenciones destaca la xuba de la cantidá máxima, que pasa de 50.000 a 70.000 euros. Esti aumentu de 20.000 euros busca sofitar a xente mozo que s’incorpore a l’apicultura o a esplotaciones dedicaes a la ganadería estensiva y que nel so plan empresarial estableza midíes preventives p’aforrar daños al ganáu por ataques de grandes carnívoros. Nel casu d’estes últimes, rellaciónense col tamañu de la esplotación.

Pela primer vez ufiértase la posibilidá de compatibilizar l’ayuda a la incorporación con formación reglada de la rama agraria o otres rellacionaes, siempre que quien acceden a la subvención faigan los estudios n’Asturies o una provincia vecina y que la duración en formatu presencial nun supere les 155 hores nel añu. La midida favorez la entrada al sector de profesionales cola formación afayadiza.

Les ayudes empobínense a xente mozo qu’al tiempu de presentar la solicitú tengan cumplíos 18 años y nun lleguen a los 41, que s’instalen como titulares pela primer vez y se comprometan a caltener l’actividá a lo llargo d’un mínimu de 5 años dende la concesión de la subvención.

Les persones interesaes tienen de plazu hasta’l 30 de xunu pa presentar les solicitúes. Han presentar un plan empresarial pa executar en trés fases y l’ayuda va facese efectiva en dos tramos: el primer pagu, que va suponer ente’l 50 % y el 65 % del total, va facese en payares d’anguaño y nel 2025 va pagase lo demás, amás de la cantidá correspondiente a la xuba hasta los 20.000 euros nos casos en que proceda.​​​