Categories Navigation

Categories Navigation

El Principáu destina 16,7 millones a ayudes p’aumentar la rentabilidá de les esplotaciones agrícoles y ganaderes

23/05/2022
  • Pela primer vez van poder acceder a estes subvenciones persones mayores de 41 años que nun seyan titulares d’un negociu d’estes característiques al tiempu de presentar la solicitú

 

 

El Gobiernu d’Asturies dedica 16,7 millones a la meyora de la rentabilidá de les esplotaciones agraries. El Boletín Oficial del Principáu (Bopa) publica güei la convocatoria de subvenciones pa esti fin. El plazu de presentación de solicitúes acaba’l 30 de xunu.

 

Les ayudes, cofinanciaes pola Unión Europea al traviés del Fondu Européu de Desenvolvimientu Rural (Feader), empobínense a titulares d’esplotaciones agrícoles y ganaderes. Pela primer vez van poder beneficiase persones que nun seyan titulares d’una esplotación al tiempu de facer la solicitú, pero qu’algamen tala condición nel momentu de la certificación final. D’esta manera, van poder acceder a les subvenciones mayores de 41 años que decidan poner en marcha una esplotación de ganáu bovino.

 

Otra de les novedaes ye la simplificación de la xestión, porque va valir con presentar un plan empresarial onde se xustifique que’l proyectu que se va desenvolver va ameyorar el rindimientu global del negociu. Los beneficiarios de l’ayuda han exercer l’actividá na esplotación nos cinco años siguientes al pagu final y caltener les inversiones subvencionaes.

 

Na convocatoria d’anguaño ampliáronse les inversiones que pueden recibir financiación. Asina, amás de la construcción o meyora d’inmuebles, les ayudes van cubrir la compra de maquinaria y equipamientu nuevo qu’ayude a aumentar la competitividá de la esplotación o qu’ameyore les condiciones agroambientales, hixénico-sanitaries y de bienestar de los ani­males; l’almacenamientu de cuchu y la mengua del consumu d’enerxía o d’agua. Igualmente, almítese la compra de vehículos nuevos de carga y tresporte p’apicultores, como furgonetes, camionetes y camiones, amás d’esplotaciones agraries en desusu. La inclusión d’esta última opción empobínase a aprovechar negocios que zarraren pero que puedan ser d’interés pa esplotaciones en funcionamientu.

La cantidá de les subvenciones pue cubrir el 40 % de los costos elixibles, un porcentaxe qu’aumenta hasta’l 60 % si los titulares de la esplotación son xente mozo.

 

Nos casos onde se faigan inversiones en zones de monte o con dificultaes naturales n’equipos de tratamientu de purín y cuchu, l’ayuda va medrar un 20 %.