• La Biblioteca d'Asturies va poner a disposición de tola sociedá al traviés de los sos fondos virtuales la colección completa de la publicación, que mientres 16 años dio voz n'asturianu a la comunidá autónoma.

La Biblioteca d'Asturies sumó güei a los sos fondos virtuales la colección de 770 exemplares del selmanariu Les Noticies, que mientres 16 años (1996-2012) analizó la sociedá del momentu en llingua asturiana. La Conseyería de Cultura, Política Llingüística y Turismu, al traviés de la Dirección Xeneral de Política Llingüística, promovió la dixitalización de les más de 20.000 páxines de la publicación pa poneles a disposición de tola xenta interesao.

El director xeneral de Política Llingüística, Antón García, entregó esta mañana los fondos dixitalizaos al director de la Biblioteca d'Asturies, Juan Miguel Menéndez Llana, en presencia d’Inaciu Iglesias, editor del históricu selmanariu. Amás, van entregase copies de la colección dixital de Les Notícies a la biblioteca de la Universidá d'Uviéu, l'Academia de la Llingua Asturiana, el Real Institutu d'Estudios Asturianos y l'Archivu Históricu d'Asturies pa facilitar la so consulta a cualquier persona interesada.

La iniciativa de dixitalizar el selmanariu asturianu naz depués de que’l so editor, Inaciu Iglesias, fixera entrega a l'alministración asturiana de la colección completa del periódicu en papel. Mientres 16 años Les Noticies centróse n'analizar l'actualidá política y cultural d'Asturies y foi un espaciu de referencia pa los más de los autores en llingua asturiana del momentu. Poles sos páxines pasaron como columnistes nomes como Xuan Bello, Marta Mori, Esther Prieto, Xabiero Cayarga, Pablo X. Suárez, José Luis Piquero, Faustino Zapico, Fonso Velázquez, Ismael G. Arias, Adolfo Camilo Díaz, Ánxel Nava, Mercedes Menéndez o'l mesmu Inaciu Iglesias.