• El Principáu ye, amás de Baleares, la única comunidá que forma parte de la Spain Convention Bureau 
• La iniciativa enmárcase nel plan d'allugamientu del turismu de negocios que l'Executivu impulsa xunto con 30 axentes públicos y privaos 

Asturies va ingresar como entidá asociada y en calidá d'observadora na Spain Convention Bureau (SCB), la rede de destinos españoles que busca promoción internacional p’acoyer eventos y congresos. Los miembros d'esta organización, 61 conceyos qu'apuesten pol turismu de negocios, aprobaron ayeri l'adhesión del Principáu, que se convierte asina na segunda comunidá n'incorporase, tres les Isles Baleares, y na primera del norte del país.

Asturies defendió la so candidatura na asamblea anual de la SCB, axuntada ayeri n'A Coruña, na que se dio'l vistu bonu a la so adhesión como sociu observador, una figura desenvuelta pa sumar a entidaes o organismos que puedan apurrir visiones nueves y enfoques más globales sobre l'impulsu del turismu de reuniones y negociu (MICE).

Na asamblea participaron representantes de más de mediu centenar de destinos que formen parte d'esta rede, nacida nel senu de la Federación Española de Conceyos y Provincies (FEMP), ente los que tán Uviéu, Xixón y Avilés. Alfredo García Quintana, conceyal d'Hostelería, Turismu y Congresos d'Uviéu; Santos Tejón, conceyal de Promoción Económica, Empléu, Turismu y Comerciu Local de Xixón, y Javier Arribas, xefe de serviciu del Conceyu d'Avilés, integraron la delegación asturiana, xunto cola xefa de marketing de la Sociedá Pública de Xestión y Promoción Turística y Cultural del Principáu, Cristina Álvarez, encargada de defender la candidatura.

Esta actuación enmárcase nel plan d'allugamientu de turismu MICE que xestiona la Viceconseyería de Turismu en collaboración con más de 30 axentes públicos y privaos vinculaos a esti sector. L'oxetivu del plan ye asociar Asturies cola idea d'un destín d'eventos d'escala humana, seguru, sostenible, profesional y competitivu en relación calidá-preciu, poniendo en valor les sos sedes singulares —tanto n’ámbitu urbanu como nel rural— y aprovechando la coxuntura favorable en materia de conexones. 

Turismu MICE 

Asturies cunta coles meyores condiciones pa convertise nun focu d'atracción del turismu MICE, calificáu asina poles sos sigles n'inglés (Meetings, Incentives, Conferencing y Exhibitions), que engloba viaxes d'eventos, feries, congresos, incentivos y toa actividá que suponga movese con fines profesionales. 

Les tres principales ciudaes de la comunidá cunten con una ufierta global cercana a les 50.000 places en sales de xuntes, gran parte n'equipamientos de gran singularidá como'l palaciu d'esposiciones y congresos Ciudad d'Uviéu, l'auditoriu Príncipe Felipe, Llaboral Ciudá de la Cultura, el recintu ferial Luis Adaro, el palaciu de congresos de Xixón o'l Centru Niemeyer d'Avilés. 

A esta realidá urbana súmase la ventaya de cuntar con más de 20 sedes n’ámbitu rural, lo que configura una ufierta bien comunicada, que dexa dir de la ciudá al altu monte en menos d'una hora y qu'ufierta numberoses esperiencies complementaries pa viaxes d'incentivu, vinculaes cola naturaleza, la cultura y la gastronomía, bien identitaries y fuertemente asociaes al territoriu. 

Según el Sistema d'Información Turística, 449.922 visitantes llegaron a Asturies por motivos de trabayu o pa participar en congresos y feries nel 2019, últimu añu con actividá normalizada nesti segmentu primero de la pandemia.