• L’ave quedó nueve meses nun centru del Principáu pa recibir tratamientu de les mancadures que presentaba y recuperar la condición física 

Axentes del Mediu Natural y personal técnico de la Conseyería de Mediu Rural y del CSIC-Universidá d'Uviéu lliberaron una utre nel Parque Natural de Redes. L'exemplar llevaba los postreros nueve meses nun centru del Principáu, onde foi tratáu de les diverses mancadures que presentaba y recibió rehabilitación pa recuperar la condición física.

L'ave foi recoyida'l 31 d'agostu de 2021 por axentes del Mediu Natural y treslladada al centru de recuperación allugáu en L'Infiestu. El so estáu yera semicomatosu, presentaba desnutrición y deshidratación graves y una quebra na nala esquierda. Depués de los primeros cuidaos, y en superando les mancadures, treslladáronlu al voladeru esterior del equipamientu pa recuperar musculación y les condiciones de vuelu óptimes.

Como ye habitual, primero de llegar a lliberalu punxéron-y dos argolles y un emisor GPS que, amás de dexar facer un siguimientu de la so evolución, consigue que l'ave pase a formar parte de la rede centinela de llucha contra’l venenu y el furtivismu n’Asturies.