• Los técnicos proponen aprovechar lo que yera la casa del conserxe y repartir otros espacios
• El proyectu dispón de 50.000 euros nel presupuestu de la conseyería p’anguaño

La Conseyería d’Educación prepara un proyectu pa ganar espacios nuevos nel IES Pérez de Ayala, d’Uviéu. Los técnicos del Serviciu d’Infraestructures tán rematando una reforma dientro del edificiu actual y no que yera la casa del conserxe, lo que va dexar crear cinco aules de 40 metros cuadraos y otra de 47, un espaciu nuevu pa l’AMPA de 30 metros cuadraos y trés zones d’almacenaxe o archivu.

La conseyera d’Educación, Lydia Espina, y la directora xeneral de Planificación y Infraestructures Educatives, María Elena Arango, mostraron güei al director del institutu’l planu sobre’l que trabayen los técnicos. La intención de la conseyería ye acometer l’ampliación nel centru primero qu’acabe l’añu. El Principáu dispón yá d’una partida específica nos presupuestos d’anguaño, que xube a 50.000 euros, pa realizar les obres.

Con esta propuesta, l’institutu recupera tolos espacios que se destinaren a aules pol aumentu de la matrícula y gana una clas más. Asina, va volver tener los llaboratorios de Física y Bioloxía, les aules de Música y Plástica y va recuperar l’usu de la biblioteca escolar a tiempu completu.

Otra manera, la conseyería tresfirió al institutu una cantidá complementaria que va dexar iguar dellos problemes d’accesibilidá primero de qu’acabe esti añu.