Categories Navigation

Categories Navigation

Barbón: “El campus de Mieres simboliza esa transformación de la que hablamos constantemente, ese camino hacia la Europa verde, digital y resiliente”

16/06/2022

El presidente del Principáu, Adrián Barbón, intervieno güei nel actu de celebración del 25 aniversariu del campus de Mieres, onde aseguró que'l complexu universitariu “simboliza'l camín hacia la Europa verde, dixital y resiliente”.

El xefe del Executivu autonómicu destacó nel so discursu dos muestres de la ciencia de vanguardia que se realiza nel equipamientu de la cuenca del Caudal. Per un sitiu, punxo en valor l'Institutu Mistu d'Investigación en Biodiversidá (IMIB), que va liderar la coordinación científica del Observatoriu de la Biodiversidá contra'l Cambéu Climáticu en collaboración con otres cinco comunidaes. Esta iniciativa va movilizar dos millones y va impulsar proyectos pa evaluar y apangar l'impactu de l'actividá humana na redolada natural. Per otra parte, Barbón señaló que'l Centru de Computación Científica de Mieres, conocíu como C3, agospia los macrodatos de distintos grupos d'investigación que tienen los sos llaboratorios n'otros campus d'Asturies.

Amás, el presidente apostó pol tresformamientu del complexu universitariu “nun polu d'investigación y tresferencia tecnolóxica d'altu valor añedíu, con protagonismu para la supercomputación y l'intelixencia artificial, los recursos naturales y la biodiversidá, la transición enerxética y l'enerxía verde, la ordenación del territoriu y el patrimoniu industrial”.

De siguío, reproducimos la intervención completa del presidente:

Güei celebramos el 20 aniversariu del campus de Mieres. En xunu de 2002, en plenu amenorgamientu de la minería, la inauguración d'estes instalaciones foi un doble d'esperanza.

La lletra del tangu cunta que 20 años nun ye nada. Nesti casu nun ye aplicable. Faigamos un pocu d'historia. Recordemos cómo, en qué condiciones se forxó l'alcuerdu que punxo en marcha esta mesma Escuela Politécnica, cómo consiguió aunir les voluntaes de les alministraciones, de los sindicatos y la mesma Universidá.

Ye bono facer memoria. El campus de Mieres nació con dellos oxetivos. Unu, yá dichu, foi esperenzar a les cuenques, face-yos ver que depués del carbón siguiría habiendo vida. Otru, devolve-yos parte de la so aportación al desenvolvimientu d'Asturies y España. Y un terceru más, dar a entender que'l futuru d'Asturies tamién siguiría pasando peles cuenques mineres.

Depués, unos años depués, empezó a recibir crítiques. Unos llamentaron la decisión, empezaron a dicir en públicu lo que siempre pensaren pero teníen callao: que'l campus fuera un erru. Otros, provecíos, esixíen más y más dotaciones con mayor axilidá. Tarrecíen qu'esti proyectu quedara varáu como una gran llosa de formigón sobre los terrenos del antiguu pozu Barredo por falta de sofitu. Sería un colosal monumentu a la ineficacia y, peor entá, la constatación de que, por más enfotu qu'hubiera, les cuenques nun teníen más porvenir que consumise amodo.

Asocede que la impaciencia y l'enfotu por ver resultaos inmediatos fáennos perder de vista que la Universidá y la ciencia precisen d'un tiempu propiu, distintu al que marquen los calendarios mediáticos y políticos, pa que los proyectos avancen y se consoliden. Güei, 20 años depués, el campus de Mieres ye una realidá adulta que tien de siguir creciendo y desenvolviéndose.

Asina qu’a lo llargo d'estos años aldericóse muncho sobre por qué nació'l campus y falóse poco del pa qué, del so oxetivu y horizonte. Esti aniversariu tamién ye un bon momentu pa dexar de mirar atrás. Si'l carbón allumó abondos años el futuru d'Asturies, agoraEl conocimiento ye, amás, una enerxía llimpia, respetuosa col mediu ambiente, potente, con un altu valor añedíu, perenal y capaz de tresformar el mundu. Nun puede haber meyor alternativa al carbón. Yéralo va venti años y sigue siéndolo agora.

Esti campus simboliza esa tresformación de la que falamos costantemente, esi camín hacia la Europa verde, dixital y resiliente. Esta escuela ye, amás, un bon xerme pal desenvolvimientu de la minería verde y pa la minería de datos, dambes xeneradores de riqueza y empléu.

Sigamos nel agora. En munches ocasiones perdemos nos pruyimientos, ensin valorar lo que tenemos nel presente. Güei quiero romper una llanza por esti presente, por esti agora, con dos exemplos amestaos a la sostenibilidá y a la tecnoloxía, dos muestres de la ciencia de vanguardia que se realiza equí, nesti complexu universitariu.

El campus ye la see del Institutu Mistu d'Investigación en Biodiversidá (IMIB), un centru nel que participamos el Principáu, la Universidá d'Uviéu y el CSIC, con personal investigador que publica en revistes internacionales ya impulsa actividaes piqueres. Esti institutu ye la vanguardia d'unu de los nuestros planes complementarios de fondos europeos, cuidao que va liderar la coordinación científica del Observatoriu de la Biodiversidá contra'l Cambéu Climáticu en collaboración con otres cinco comunidaes. Esto ye, dende esti campus va desenvolvese una iniciativa que va movilizar dos millones y va impulsar proyectos destinaos a evaluar y apangar l'impactu de l'actividá humana na redolada natural.

Voi col segundu exemplu. La pasada selmana p`resentóse nel campus d'El Cristu un dispositivu de vanguardia pal estudiu xenéticu de los tumores, un equipu capaz de dixebrar 10.000 célules nuna sola muestra. La enorme cantidá d'información que se xenera, miles de datos, analícense equí, nesti edificiu. De xuro munchos nun lo saben, pero'l Centru de Computación Científica (conocíu como C3) agospia los macrodatos (big data) de distintos grupos d'investigación que tienen los sos llaboratorios n'otros campus.

Alcemos yá la vista hacia'l futuru. Con plenu respetu a l'autonomía universitaria, entendemos que'l plan estratéxicu, aprobáu con un ampliu consensu, ye un bon puntu de partida pa siguir avanzando hacia la excelencia. Esi plan inclúi un decidíu apueste por esti campus de Mieres. El mio gobiernu va trabayar de la mano de la Universidá d'Uviéu pa fac ela realidá, y va facelo pensando con xenerosidá no meyor p'Asturies, percima de les llexítimes aspiraciones locales.

El rector va permitime qu'incida en dalgunos de los retos que recueye'l so proyectu pa esti campus. Falamos de la so tresformación nun polu d'investigación y tresferencia tecnolóxica d'altu valor añedíu con protagonismu pa la supercomputación y l'intelixencia artificial, los recursos naturales y la biodiversidá, la transición enerxética y l'enerxía verde, la ordenación del territoriu y el patrimoniu industrial.

Toes elles son llinia acordes cola nuestra Estratexa d'Especialización Intelixente, anguaño n'evaluación n'Europa y qu'esperamos poner en marcha nos próximos meses.

Un campus ye docencia ya investigación, nun hai dulda, pero tamién ye tresferencia de conocencia ya implicación nel texíu granible y social. Nesta llínea camina tamién la propuesta permita’l desenvolvimientu de compañíes innovadores, startups y spinoffs; qu'impulse, a última hora, el emprendimientu tecnolóxicu de la mocedá titulada.

Va venti años, n'este mesmu llugar, don Felipe de Borbón, entós Príncipe d'Asturies, afirmó:

“La Universidá non solo se dedica a la tresmisión de conocimientos, sinón que xenera nueves idees, promueve l'espíritu científicu y tien un papel fundamental en socializar les meyores tecnolóxiques que tiren del carru del progresu”.

Estes palabres siguen teniendo güei la mesma vixencia y actualidá, y l'Universidá tien el retu de siguir tirando d'esi carru del progresu de les cuenques y de toa Asturies. Con certidume, nesti casu'l tangu miente: 20 años foi enforma pal campus de Mieres.