• Estes places van otorgar más puntos al personal interino y tamién van beneficiar a los funcionarios que pretendan participar nun concursu de tresllaos 

La Conseyería d'Educación va ampliar la llista de puestos docentes de desempeñu difícil dientro del sistema públicu y va incluyir les places creaes nes aules abiertes y tamién los centros públicos con problemes d'espaciu que cunten con clases modulares instalaes al empiezu de cada cursu. 
Esta ye la propuesta que la conseyera d'Educación, Lydia Espina, acompañada pol director xeneral de Personal Docente, Miguel Sariego, treslladó güei a les organizaciones sindicales nes meses de negociación. L'Alministración tuvo en cuenta la pitición de considerar les aules abiertes y propunxo, a iniciativa propia, incorporar los centros con aules modulares, atendiendo a la so casuística especial. 

La negociación nun ta tovía zarrada. Los sindicatos plantegaron otres piticiones que la conseyera comprometióse a estudiar primero de convocar una xunta nueva. Unu d'estos aspectos consiste na creación d'una categoría de centros preferentes que diba incluyir aquellos con singularidá especial y que les sos característiques habría que determinar. 

Los puestos docentes de desempeñu difícil reporten beneficios al personal que los ocupa. Quien s'atopen en llistes d'interinidá reciben una puntuación estra que s'incorpora al so historial. Los funcionarios y les funcionaries de carrera tamién tienen una bonificación cuando participen nun concursu de tresllaos, si nel momentu en que se presenten tán ocupando una plaza d'estes característiques.

La llista de puestos de desempeñu difícil reconocíos hasta agora incluye dende centros rurales agrupaos alloñaos del área central a les escueles hogar, los centros d'educación especial o les aules d'inmersión llingüística, ente otros exemplos.

La conseyería anunció que, a partir de setiembre, va haber en funcionamientu 21 aules abiertes, destinaes a alumnáu con trestornu del espectru autista, atendíes por 42 especialistes. Amás, dos centros –IES La Corredoria (Uviéu) y Rey Pelayo (Cangues d'Onís)– cunten con aules modulares.