• El Principáu llanza dos llinies de subvenciones p’actividaes de divulgación de la I+D+i en centros públicos y n'empreses 
• El conseyeru Borja Sánchez destaca'l proyectu del alumnáu del IES Peñamayor sobre l’unviu de muestres de sidra a la estratosfera como exemplu de vocación científica.

El Gobiernu d'Asturies destina 900.000 euros a favorecer la divulgación científica y la ciencia ciudadana. La Conseyería de Ciencia, Innovación y Universidá impulsó dos convocatories, una pal sector priváu y otra pa centros d'investigación públicos, cola mira de financiar actividaes qu'averen la investigación y la innovación a la ciudadanía y favorezan les vocaciones científiques ente la mocedá. 
El conseyeru Borja Sánchez aludió a les convocatories na so visita al IES Peñamayor, en Nava, onde conoció de primera mano'l proyectu Un culete estratosféricu, desenvueltu por alumnáu de Bachilleratu y escoyíu pa un programa nacional de ciencia ciudadana. 
La llinia d'ayudes pa la divulgación de la I+D+i, dotada con 495.000 euros y en periodu de valoración de propuestes, incrementó'l so presupuestu en 80.000 euros al respective del añu pasáu y ta dirixida a fomentar la collaboración público-privada. Ente los sos oxetivos figuren la promoción d'acciones enfocaes a les vocaciones STEM (Ciencies, Tecnoloxía, Inxeniería y Matemátiques, nes sos sigles n'inglés) y la divulgación de la ciencia. 
La segunda convocatoria, xestionada pola Fundación pal Fomentu n'Asturies de la Investigación Científica Aplicada y la Tecnoloxía (Ficyt), cunta con 400.000 euros y diríxese a centros y instituciones d'investigación pa la organización d'actividaes vinculaes a la divulgación científica. Esta llinia va publicase nel Boletín Oficial del Principáu d’Asturies (BOPA) nos díes próximos.
El conseyeru punxo de relieve l'interés del Gobiernu d'Asturies pol fomentu de la ciencia ciudadana y destacó l'actividá realizada pol alumnáu del IES Peñamayor como exemplu de vocación científica. 
El proyectu Un culete estratosféricu consistió n'unviar sidra natural y llevadures nun globu sonda, a unos 30 quilómetros d'altitú, y evaluar l'efectu que les condiciones d'un vuelu estratosféricu exercen nes muestres. La iniciativa foi escoyida pola Fundación Ibercivis ente numberoses propuestes nacionales pa la misión Servet de ciencia ciudadana. L'esperimentu foi realizáu con éxitu en mayu en Zaragoza. 
Parte del alumnáu participante, xunto col profesor Iván Fernández, impulsor de la propuesta, esplicaron güei los resultaos del proyectu científicu, que cuntó col sofitu del Serviciu Rexonal d'Investigación y Desenvolvimientu Agroalimentariu (Serida). La iniciativa concluyó cola recuperación del globu sonda y l'análisis de datos, que reflexaron delles alteraciones nes muestres y podríen dar orixe a acciones nueves d'investigación. 
El conseyeru destacó'l valor de qu'esti tipu d'actuaciones de los centros educativos se dean a conocer a la sociedá. “El futuru d'Asturies y de los sos emplegos ta nes vocaciones STEM”, aseguró.