• El programa Housing first y la rehabilitación integral del barrio de San José de Lada, entre los cinco meyores de 70 candidaturas procedentes de 20 países de la UE

Dos programes de vivienda del Gobiernu del Principáu quedaron finalistes na cuarta edición de los Premios Europeos de Vivienda Responsable que s'apurren güei en Helsinki, nel marcu de celebración del Festival Internacional de Vivienda Social: el proyectu Housing first, dirixíu a persones con una llarga trayectoria na cai, y l'obra de rehabilitación integral del barriu de San José de Lada.

Presentaos dambos pola Conseyería de Derechos Sociales y Bienestar, asitiáronse ente los cinco meyores de les 70 candidatures procedentes de 20 países de la Unión Europea, hasta'l puntu de competir n'igualdá de condiciones con ciudaes como París, Berlín o Barcelona.

Dientro de la categoría Más qu'un techu, el xuráu compuestu por 15 espertos en vivienda y urbanismu de la Comisión Europea, el Bancu Européu d'Inversiones y el Sindicatu Européu d'Inquilinos- destacó la garantía del derechu a la vivienda del programa Housing first, que se materializa cola firma d'un contratu d'arriendu que convierte a los participantes n'inquilinos de plenu derechu.

Tamién valoró l'usu de viviendes públiques pa esti fin, lo que garantiza que al términu del programa d’apoyu y acompañamientu los inquilinos puedan permanecen na so casa. Coles mesmes, los resultaos n'aspectos como la meyora de la hixene, salú, relaciones sociales y familiares o autonomía, ente otros, contribuyeron a convertir esti programa nun referente européu que nos próximos meses va doblar los recursos disponibles pa la prevención y erradicación del sinhogarismu n'Asturies. Hasta agora yá se beneficiaron 48 persones.

Na obra de rehabilitación integral del barriu de San José de Lada, finalista na categoría Líderes d'innovación y axentes d'una transición enerxética xusta”, el xuráu valoró l'esfuerzu d'información y participación colos inquilinos lleváu a cabu pola dirección xeneral de Vivienda y Vipasa y destacó’l so impactu en cuatro ámbitos: l'aforru económicu, que llega hasta los 1.200 euros al añu; el grau de confort que consiguieron les viviendes; l'accesibilidá de les plantes baxes y la tresformación estéticu qu'esperimentó'l barriu, que se convirtió nun modelu de rexeneración urbana.