El xefe del Executivu va zarrar la ronda cola ministra Raquel Sánchez, a quien-y va reclamar que se peracabe en plazu la variante de Payares, el desenvolvimientu del plan de choque de les cercaníes ferroviaries y un siguimientu escrupulosu de les inversiones previstes na comunidá.

El domingu va participar nun alderique entamáu por TVE-1 p’analizar los resultaos de les elecciones andaluces y el martes va asistir a la xunta del patronatu de la Fundación Princesa d'Asturies.

El presidente del Principáu va esixir esplicaciones pola baxa execución presupuestaria y va encetar la evolución de distintos proyectos importantes para Asturies

El presidente del Principáu, Adrián Barbón, va caltener el llunes y el martes una ronda de xuntes en Madrid con cinco ministerios pa esixir el cumplimientu de les inversiones presupuestaes n'Asturies y evaluar el desenvolvimientu de dalgunos de los proyectos más relevantes pa la comunidá autónoma.

Por orde, les entrevistes del llunes van ser les siguientes: Luis Planas, ministru d'Agricultura, Pesca y Alimentación; Reyes Maroto, ministra d'Industria, Comerciu y Turismu; Teresa Ribera, vicepresidenta tercera y ministra pa la Transición Ecolóxica y el Retu Demográficu; y Félix Bolaños, ministru de Presidencia, Relaciones coles Cortes y Memoria Democrática. El martes, día nel que tamién va asistir al patronatu de la Fundación Princesa d'Asturies, va vese cola titular de Tresportes, Movilidá y Axenda Urbana, Raquel Sánchez.

L'axenda del presidente inclúi dellos actos na capital d'España nos próximos díes. La tarde del domingu va participar nun programa especial de TVE-1 p’analizar el resultáu de les elecciones autonómiques andaluces. El llunes va dedicase por entero a los alcuentros colos ministerios y el martes va compatibilizar l'asistencia al patronatu de la Fundación Princesa cola entrevista cola titular de Tresportes.

Barbón, como'l restu de miembros del Gobiernu d'Asturies, caltién contactos habituales colos ministros y ministres del Executivu estatal. Al conocer los datos d'un informe de la Intervención Xeneral del Estáu según los cualos el grau d'execución de les inversiones previstes en 2021 nel Principáu llimítense al 40%, reaccionó de momentu. Primero, pidió esplicaciones a Félix Bolaños, titular de Presidencia, en cuanto coordinador de tolos ministerios, y depués apremió la preparación d'esti maratón ministerial.

El presidente va aprovechar les xuntes para pidir esplicaciones sobre la execución presupuestaria, llanzar propuestes, reclamar nuevos compromisos ya intercambiar información de primera mano sobre la situación de dellos proyectos estratéxicos p’Asturies, como la variante de Payares o'l plan de choque de les cercaníes ferroviaries. Amás, va reclamar que s'arbitre un mecanismu que permita un siguimientu escrupulosu de les inversiones previstes nel Principáu.

El calendariu previstu ye'l siguiente:

•Llunes, 09:00 hores. Xunta col ministru d'Agricultura.

•Llunes, 14:30 hores. Xunta cola ministra d'Industria.

•Llunes, 16:00 hores. Xunta cola vicepresidenta tercer y ministra de Transición Ecolóxica.

•Llunes, 18:00 hores. Xunta col ministru de Presidencia.

•Martes, 19:30 hores. Xunta cola ministra de Tresportes.