Categories Navigation

Categories Navigation

El Principáu recupera la celebración festiva del Día d’Asturies, qu’esti añu va tener llugar en Corvera

18/06/2022

 

  • Les actividaes van empezar el día 8 y van enllargase tola fin de selmana, en coincidencia cola festividá local del conceyu
  • L'últimu exerciciu nel que se programaron foi 2019, en Cabrales; los dos años siguientes nun se celebró pola pandemia 
  • El conceyu yá fuera escoyíu fai 35 años, en 1987, con un conciertu de Franco Battiato como principal atracción 
     

El Conseyu de Gobiernu decidió recuperar esti añu les actividaes festives venceyaes a la celebración del Día d'Asturies, depués de dos exercicios consecutivos suspendíes pola pandemia. Van tener llugar en Corvera, van empezar el xueves 8 de setiembre y van enllargase tola fin de selmana, en coincidencia cola festividá local.  
 
L'últimu exerciciu nel que'l Principáu entamó estes actividaes foi en 2019, en Cabrales. Mientres los dos siguientes fueron suspendíos por causa de la crisis sanitaria. La recuperación progresiva de la normalidá, a partir de la meyora de la situación epidemiolóxica, dexa agora volver a entamar estes celebraciones.  
 
Los actos rellacionaos col 8 de setiembre, que *tradicionalmente inclúin mercaos, competiciones deportives, recitales y animaciones para tolos públicos, van coincidir nesta ocasión cola festividá local del conceyu, el día 9.   
 
La última vegada que Corvera acoyó les celebraciones del día d'Asturies foi fai 35 años, en 1987, con un conciertu de Franco Battiato como principal atracción. 
 
Per otra parte, el Principáu yá anunció la concesión de les Medayes d'Asturies, qu'anguaño van distinguir a la Fundación Bancu d'Alimentos; la Comunidá de Monxes del Monesteriu de San Pelayo (Uviéu); l'embaxador d'España en Canadá, Alfredo Martínez; el xugador de balonmano RaúlEntrerríos y la quesera artesanal Isaura.