Categories Navigation

Categories Navigation

Barbón confirma que la variante de Payares va tar en serviciu en mayu

22/06/2022
  • ​​​​​El Conseyu de Ministros va aprobar en xunetu la entrada a valir de les bonificaciones previstes para rebaxar el peaxe del Güerna
  • El Gobiernu d'Asturies va publicar nes próximes selmanes la convocatoria del Bono Arriendu, dotada con 6,6 millones, para favorecer l'accesu de la mocedá a la vivienda

El presidente del Principáu remata'l so maratón ministerial con una entrevista cola titular de Tresportes, Raquel Sánchez, quien se compromete a entainar les obres de l'autovía del suroccidente y del tercer carril de la Y

La variante ferroviaria de Payares, la infraestructura más demandada de la historia recién d'Asturies, va entrar en serviciu pa pasaxeros y mercancíes en mayu de 2023, según anunció güei el presidente del Principáu. Adrián Barbón tamién adelantó que les bonificaciones previstes para rebaxar el peaxe del Güerna van entrar a valir en xunetu, una vegada aprobaes pol Conseyu de Ministros.

Barbón remató esta tarde'l so maratón ministerial madrilanu con un alcuentru con Raquel Sánchez, responsable de Tresportes, Movilidá y Axenda Urbana. Al términu, el xefe del Gobiernu confirmó la creación d'una comisión billateral encargada de supervisar el cumplimientu de les inversiones previstes n'infraestructures, que va celebrar la so primer xunta en xunetu. Precisamente, el baxu grau d'execución presupuestaria algamáu en 2021 –un 40%, conforme a les estimaciones de la Intervención Xeneral del Estáu- foi l'orixe de la serie d'entrevistes encadenaes pol presidente ayeri y güei colos titulares d'Agricultura, Industria, Transición Ecolóxica, Presidencia y Tresportes.

Acompañáu pol viceconseyeru d'Infraestructures, Jorge García, Barbón repasó l'estáu de les comunicaciones. La ministra asumió bona parte de los compromisos plantegaos pol presidente del Principáu, como la puesta en marcha de la variante de Payares nel plazu previstu y l'aplicación de les bonificaciones alcordaes pal peaxe del Güerna: el Conseyu de Ministros va aprobales en xunetu y van entrar a valir a otru día.

L'axilización de les obres en marcha foi otra de les demandes atendíes pola ministra. Asina, a la próxima finalización de la ponte de La Barrosa va siguir un calendariu con plazos p'acelerar l'autovía del suroccidente (A-63), vertebral pa la contorna. Tamién se van intentar aforfugar los trabayos de construcción del tercer carril de l'autopista Y, qu'enllaza Uviéu, Xixón y Avilés.

Barbón aprovechó p'anunciar otru llogru: el Gobiernu d'Asturies va publicar nes próximes selmanes la convocatoria del Bonu Arriendu dotada con 6,6 millones, concebíu pa favorecer l'accesu a la vivienda de los xóvenes. Depués de que'l Conseyu de Gobiernu autorizara'l gastu, falta que'l Boletín Oficial del Principáu publique oficialmente la convocatoria.