Categories Navigation

Categories Navigation

El Gobiernu d’Asturies va invertir 90 millones en cuatro años pa convertir l’Alministración nuna plataforma dixital de servicios públicos pa la ciudadanía

28/06/2022
  • La conseyera de Presidencia destaca’l cambéu a un modelu qu’aspira a ser el más usáu polos usuarios
  • L’Executivu presenta en Xixón esti plan a otres alministraciones públiques, compañíes del sector, organizaciones empresariales y profesionales tecnolóxicos
  • El vicepresidente Cofiño asegura que’l Principáu "ye un territoriu ideal pa esta tresformación, que favorez el desenvolvimientu económicu, mengua desigualdaes y ameyora la productividá”

El Gobiernu del Principáu va invertir 90 millones nos cuatro años vinientes p’acometer la tresformación alministrativa más grande fecha nos cuarenta años d’autonomía d’Asturies: el pasu d’una xestión convencional a una plataforma de servicios públicos dixitales al serviciu de la ciudadanía, que va ufiertar una forma nueva de tramitación eficiente, áxil y proactiva, qu’impulse la tresparencia y la capacitación dixital de la sociedá y les empreses.

Asina lo anunciaron güei en Xixón el vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, y la conseyera de Presidencia, Rita Camblor, que presentaron el Plan Estratéxicu de Tresformación Dixital Asturies, Territoriu Dixital nuna xornada empobinada a otres alministraciones públiques, compañíes del sector, organizaciones empresariales y profesionales de tecnoloxíes nueves, ente otros, onde destacaron qu’estes midíes suponen el principiu d’una revolución tecnolóxica verdadera cola que’l Gobiernu del Principáu se comprometió como una de les exes centrales de medría y recuperación económica.

Nesta llinia d’actuación, el Principáu yá destinó 43 millones nos últimos meses a la creación d’una factoría de software, al traviés d’un alcuerdu marcu con firmes especializaes del sector dedicaes a la consultoría, diseñu y desenvolvimientu de soluciones tecnolóxiques. Tamién va invertir 42,8 millones n’actualizar la estructura de telecomunicaciones; otros 3,6 nel suministru y caltenimientu de llicencies informátiques que dexen facer análisis de los procesos y del big data, y mediu millón más pa llograr un sistema centralizáu de custodia de certificaos dixitales.

Cofiño destacó que “Asturies ye un territoriu más que favorable pa protagonizar una tresformación dixital verdadera que favoreza’l desenvolvimientu económicu, ayude a la mengua de desigualdaes, dexe ameyorar la productividá y la calidá de los servicios de la nuestra Alministración y aprovechar al máximu les oportunidaes que nos ufierten les tecnoloxíes nueves”.

El retu va beneficiar a la sociedá, al texíu empresarial y a la propia Alministración autonómica y los sos emplegaos públicos. “Tola ciudadanía va beneficiase d’una tresformación dixital diseñada pa rellanzar la medría económica, menguar les desigualdaes, aumentar la productividá, fortalecer los nuestros servicios públicos y ufiertar una alministración más eficiente”, aseguró. “Invertir nuna alministración dixital ye dar facilidá a les empreses pa facer negocios nun entornu que ye más eficiente na midida en que ye más rápidu y cenciellu”, añadió.

La conseyera de Presidencia, pela so parte, esplicó que l’oxetivu ye fomentar l’usu de les tecnoloxíes nueves “pa que la propia Alministración impulse y acompañe la evolución de la sociedá y la rellación cola ciudadanía. Esti procesu ye un cambéu nel paradigma de los procedimientos: el pasu d’un modelu de tramitación d’espedientes a otru de serviciu públicu, de manera que la canal dixital seya la usada de manera preferente polos usuarios”. Pa Camblor, al revés de lo que tán faciendo dalgunos bancos y empreses “nun tenemos que dexar a naide atrás, nin podemos, y menos tovía a dalgunes de les persones más vulnerables de la sociedá, que son precisamente a menudo quien más nos necesiten”.

Na xornada de güei anunciáronse dalgunos de los proyectos incluyíos nesta estratexa dixital, como la creación de dos llaboratorios públicos d’innovación abierta de cobertura 5G Stand Alone; la creación d’una oficina del datu como base pa la toma de decisiones; la identidá dixital soberana; l’impulsu de la tramitación electrónica, qu’actualmente yá incluye 1.200 procedimientos electrónicos; la dixitalización de les carreteres; la historia social única de les persones, y la creación d’un asistente social virtual basáu na intelixencia artificial.


Leer en Gobierno > Actualidad​​​​​​​