Categories Navigation

Categories Navigation

Amancio Prada va llevar el Cántico espiritual de San Juan de la Cruz a la basílica de Cuadonga

30/06/2022
  • El recital del cantautor llionés va celebrase’l 7 de xunetu y supón la primer cita musical de la programación impulsada pol Principáu pola conmemoración de los 1.300 años de la batalla

La basílica de Cuadonga va acoyer el xueves, 7 de xunetu, un conciertu d’Amancio Prada, que va interpretar la versión pa voz, guitarra, violín y violonchelu del Cántico espiritual de San Juan de la Cruz. Trátase de la primer cita musical dientro de la programación que la Conseyería de Cultura, Política Llingüística y Turismu preparó pa conmemorar los 1.300 años de la batalla de Cuadonga. L’accesu va ser de baldre y les entraes pueden sacase nesti enllaz: https://cutt.ly/eKHYlWT

El recital propón un averamientu a ún de los clásicos del cantautor llionés, que presentó la so primer versión de la obra de San Juan de la Cruz en París en 1973. A lo llargo d’esti cuasi mediu sieglu, Amancio Prada interpretó versiones del Cántico en toa clas de formatos per escenarios de mediu mundu. La puesta n’escena que’l públicu va poder disfrutar en Cuadonga ufierta la versión orixinal y más renomada.

El conciertu d’Amancio Prada abre l’axenda musical de les celebraciones polos 1.300 años de la batalla, que va incluyir tamién actuaciones de la Orquesta Sinfónica del Principáu d’Asturies y del tenor Joaquín Pixán, ente otres. Amás, el Gobiernu d’Asturies va desenvolver nos meses vinientes un programa ampliu d’actividaes que busca averar al gran públicu la buelga fonda que la efeméride histórica dexó nel heriedu cultural, patrimonial, espiritual y turísticu d’Asturies.

Reseña biográfica d’Amancio Prada

El trabayu musical d’Amancio Prada (Dehesas, Llión, 1949) como compositor y intérprete tuvo siempre una base lliteraria que, a lo llargo de la so discografía, foi conformando un percorríu antolóxicu pela llírica peninsular, dende les cantigues de los primeros trovadores gallego-portugueses (ss. XII y XIII), pasando pel Romanceru, Juan del Enzina, Jorge Manrique, San Juan de la Cruz, Santa Teresa, Gustavo Adolfo Bécquer y Rosalía de Castro, hasta autores contemporáneos como Federico García Lorca, Juan Ramón Jiménez, María Zambrano, Álvaro Cunqueiro, Carmen Martín Gaite, Agustín García Calvo, Luis López Álvarez, Antonio Pereira y Juan Carlos Mestre.

Ente otros gallardones, recibió la Medalla Castelao de Galicia (1995), Premio Castilla y León de las Artes (2005), Grand Prix du Répertoire Sacem (París, 2008), Premio Tenco (San Remo, 2010), Medalla de Oro al Mérito en las Bellas Artes (2011), Premio da Cultura Galega (2019), VII Premio de Cultura de la Universidad de Sevilla (2020) o l’European Guitar Foundation (2021).


Leer en Gobierno > Actualidad