• El presidente sorraya’l determín del Executivu de caltener una rellación política preferente con IX, como vieno pasando tola llexislatura

El presidente del Principáu aseguró güei que’l Gobiernu va presentar un proyectu presupuestariu pal 2023 social y progresista. Adrián Barbón tamién sorrayó’l determín del Executivu de caltener una rellación política preferente con Izquierda Xunida (IX), como vieno pasando tola llexislatura.

El presidente respondió esta mañana na Xunta Xeneral a les preguntes de los grupos parllamentarios. Nes sos contestaciones a IX y Podemos, Barbón repitió que va tentar d’algamar un alcuerdu que dexe aprobar el cuartu presupuestu siguíu de la llexislatura. Sicasí, alvirtió que sigue considerándolo “mui difícil” polo averao de les elecciones autonómiques y municipales de mayu.

El xefe del Gobiernu reconoció les diferencies con Izquierda Xunida tocante al proyectu de Llei de Calidá Ambiental, que tien como ún de los sos oxetivos simplificar los trámites alministrativos pa favorecer l’actividá empresarial. “Tenemos declarada la guerra a la burocracia”, afirmó Barbón. Sicasí, aseguró que, al so paecer, esta discrepancia nun significa la ruptura del alcuerdu d’investidura algamáu con IX. Ello ye qu’invitó a Ángela Vallina, portavoz d’IX, a analizar en comuña la evolución de les rellaciones ente’l gobiernu, la Federación Socialista Asturiana y IX.

Nel trescursu de la sesión de control, el presidente defendió los resultaos de la rolda de reuniones ministeriales celebraes va poco. El compromisu de l’apertura de la variante de Payares en mayu del 2023, l’autorización pa la puesta en marcha de la regasificadora d’El Musel y la instalación d’un centru d’economía forestal en Tinéu son dalgunos de los llogros algamaos nos alcuentros.

Leer en Gobierno > Actualidad