Categories Navigation

Categories Navigation

El Principáu saca a la lluz nuna esposición fotográfica’l procesu de construcción de la basílica de Cuadonga va 130 años

03/07/2022
  • La retrospectiva forma parte de los actos de conmemoración de los 1.300 años de la batalla y pue visitase a últimos de xunetu na Casa de Cultura de Cangues d’Onís
  • La conseyera de Cultura, Berta Piñán, inaugura una muestra cola obra de Daniel Álvarez Fervienza, el fotógrafu que rexistró a lo llargo de 20 años la tresformación del Real Sitiu

Doscientes plaques fotográfiques feches ente 1890 y 1910 retraten el procesu de construcción de la basílica de Cuadonga, un proyectu que representó un desafíu técnicu, loxísticu y económicu singular daquella. La conseyera de Cultura, Política Llingüística y Turismu, Berta Piñán, inauguró güei, acompañada pol alcalde de Cangues d’Onís, José Manuel González, la esposición Cuadonga na mirada fotográfica de Daniel Álvarez Fervienza. La muestra axunta’l trabayu que fixo a lo llargo de dos décades pa documentar la evolución de la construcción del templu y la tresformación radical que sufrió tola contorna.

La retrospectiva forma parte de la programación que’l Gobiernu d’Asturies promueve pa conmemorar los 1.300 años de la batalla de Cuadonga y va poder visitase de baldre hasta esti 29 de xunetu na Casa de Cultura de Cangues d’Onís.

Álvarez Fervienza ye ún de los primeros nomes de la historia de la fotografía asturiana que se convirtió en profesional depués d’exercer como maestru en Llanes. El so heriedu forma parte de la colección privada d’Antonio Diego, comisariu de la esposición, qu’emprestó’l material pa la so exhibición.

La selección d’imáxenes exhibíes constata la posición privilexada que tuvo Fervienza pa retratar tol contestu de la construcción de la basílica al ser contratáu pa documentar el procesu de construcción. Dalgunes de les imáxenes que tomó convirtiéronse a posteriori en postales que se difundieron masivamente y ayudaron a proyectar la imaxe de Cuadonga dientro y fuera de les nuestres fronteres. Fervienza foi’l primeru en facer la instantánea del templu ente los montes imponentes.

Cuadonga na mirada fotográfica de Daniel Álvarez Fervienza ye una de les seis esposiciones que’l Gobiernu d’Asturies diseñó pola mor del aniversariu de la batalla de Cuadonga y que formen parte d’una programación estensa qu’incluye conciertos, conferencies, alcuentros científicos o edición de publicaciones específiques.


Leer en Gobierno > Actualidad