Categories Navigation

Categories Navigation

El Gobiernu d’Asturies va construyir en Llugones 44 pisos d’arriendu pa menores de 35 años

03/07/2022
  • Ta previsto que les obres, dotaes d’una inversión de trés millones, rematen enantes de xunu del 2026

- La conseyera de Derechos Sociales, Melania Álvarez, adelantó que’l BOPA va publicar el martes la convocatoria del Bonu Arriendu Mozu, que va beneficiar n’Asturies a 1.300 persones

El Gobiernu d’Asturies va construyir en Llugones (Siero) 44 viviendes d’arriendu social empobinaes prioritariamente a menores de 35 años. La conseyera de Derechos Sociales, Melania Álvarez, y el director xeneral de Vivienda, Fermín Bravo, visitaron esta mañana la zona onde se va llevantar la edificación. Tamién asistió l’alcalde, Ángel García.

La obra va suponer una inversión calculada de trés millones que va financiase con fondos del Mecanismu de Recuperación y Resiliencia. El preciu del arriendu va ser limitáu, como recueye l’alcuerdu de la comisión billateral ente’l Ministeriu de Tresportes, Movilidá y Axenda Urbana y el Gobiernu d’Asturies. L’inmueble, allugáu na cai d’El Castru, va tener un máximu de cuatro altures y 44 viviendes —38 d’un cuartu y seis con dos cuartos— y una planta de garaxe. Calcúlase que les obres rematen enantes de xunu del 2026.

Na visita, la conseyera destacó qu’esti “apueste del Gobiernu d’Asturies pola emancipación xuvenil afianza, al empar, el compromisu del Executivu col aumentu del parque públicu de vivienda, el segundu más grande d’España”. “Amás, facilita l’accesu a una vivienda asequible en zones en desenvolvimientu urbanísticu, como Llugones”.

Álvarez adelantó que’l BOPA va publicar el martes la convocatoria del Bonu Alquiler Mozu, una ayuda estatal adicional pal impulsu del accesu a la vivienda y a la emancipación dotada con 6,6 millones y que va beneficiar n’Asturies a unes 1.300 persones.

Depués de la publicación de la convocatoria, quien cumplan los requisitos establecíos van poder pidir esta ayuda hasta’l 30 d’avientu del 2023. La cantidá va tar ente 250 y 600 euros p’arriendos de vivienda. Nel casu d’arriendu de cuartos, el máximu va ser de 300 euros.


Leer en Gobierno > Actualidad