Categories Navigation

Categories Navigation

Asturies y Cantabria esploren víes de collaboración pa promover la economía social

21/07/2022
  • Los Gobiernos d’Asturies y de Cantabria esploren víes de collaboración pa impulsar la economía social nel marcu del Plan de Recuperación, Tresformación y Resiliencia. Asina lo aseguró’l director xeneral de Comerciu, Entamadores y Economía Social, Julio Zapico, depués d’aconceyar col director xeneral de Trabayu de Cantabria, Gustavo García.

 

Pela parte del Principáu, nel alcuentru participaron tamién el director xeneral d’Asuntos Europeos, Javier Vila; la directora de la Oficina d’Asuntos Europeos, Raquel García, y el director de la Fundación pal Fomentu de la Economía Social, Edmundo Pérez. En representación del Executivu cántabru asistieron la directora xeneral d’Asuntos Europeos, Paz Díaz, y Carmen de la Riva, técnica de la Oficina de Fondos Europeos.

 

Na xunta de trabayu tratáronse les llinies del Proyectu Estratéxicu pa la Recuperación y Tresformación Económica (PERTE) de la Economía Social y de los Curiaos y les posibilidaes pa que dambes comunidaes impulsen un centru d’operaciones (hub) de vanguardia n’economía social, que faiga posible la tresferencia y intercambéu de conocencia y la promoción del emprendimientu.

 

El PERTE de la Economía Social y de los Curiaos tien un presupuestu de 800 millones y busca, ente otros oxetivos, el desenvolvimientu de servicios avanzaos nel ámbitu de los cuidaos, afayadizos y centraos nes persones.