Categories Navigation

Categories Navigation

Educación incluye 73 especialidaes nel concursu de méritos pa la estabilización del profesoráu

21/07/2022
  • La Conseyería va convocar 234 places primero de qu’acabe l’añu

 

La Conseyería d’Educación presentó una propuesta pa repartir les 234 places del concursu de méritos del plan d’estabilización del personal docente ente 73 especialidaes. La convocatoria d’esti procedimientu estraordinariu ha publicase primero del 31 d’avientu, como establez el Real Decretu 270/2022, del 12 d’abril.

El Principáu trabaya agora de manera coordinada con otres comunidaes y col Ministeriu d’Educación y Formación Profesional p’harmonizar les feches de celebración del concursu de méritos.

El director xeneral d’Enseñances Profesionales, Javier Cueli, treslladó güei la propuesta a les organizaciones sindicales integrantes de la Xunta de Personal Docente non Universitariu y comprometióse a estudiar les aportaciones que quieran presentar. La documentación que se-yos entregó detalla eses 73 especialidaes, ente les que destaquen Matemátiques, en Secundaria, con 23 places; Inglés, tamién en Secundaria, con 12, o Educación Primaria, con 9.

Por cuerpos, el profesoráu de Secundaria va ocupar 139 puestos del plan d’estabilización; el de Primaria, 29; los docentes de Música y Artes Escéniques, 28; los d’Artes Plástiques y Diseñu, 27, y les escueles oficiales d’idiomes, les 11 que queden.

La intención de la Conseyería ye negociar dende setiembre’l repartu por especialidaes de les otres 1.328 places que formen parte del procesu d’estabilización y que van convocase con concursu-oposición.

En total, esti procedimientu va afianzar 1.562 puestos ocupaos na actualidá por profesoráu interino. Estes places negociáronse dientro d’una ufierta estraordinaria d’emplegu públicu pa tola Alministración que tuvo l’aprobación de les organizaciones sindicales UXT, CC.OO. y CSIF.