Categories Navigation

Categories Navigation

El Principáu empieza los trabayos de reconstrucción de la estación de Valgrande-Payares, que van movilizar 9,7 millones pa impulsar el turismu nel valle de Ḷḷena

21/07/2022
  • La conseyera Berta Piñán visitó güei l’actuación, financiada con fondos mineros y pensada pa que l’equipamientu pueda ufiertar servicios tol añu

El Gobiernu d’Asturies empezó los trabayos de reconstrucción de la estación d’esquí de Valgrande-Payares, que van movilizar 9,7 millones pa impulsar el turismu y convertir l’equipamientu en motor económicu del valle de Ḷḷena. L’actuación sofítase nun conveniu soscritu pol Principáu y el Ministeriu pa la Transición Ecolóxica y el Retu Demográficu, que contribuyen col 25 % y el 75 % de los fondos, respectivamente.

La conseyera de Cultura, Política Llingüística y Turismu, Berta Piñán, visitó güei les obres, que s’axusten al calendariu anunciáu pol so departamentu. “Yá tenemos máquines trabayando a estaya y con un cronograma que nos dexa planificar afayadizamente, pa nun tener qu’interrumpir la temporada viniente d’esquí y poder siguir depués cola execución”, señaló.

El proyectu pa la estación ḷḷeniza ye’l de más volume d’inversión ente los alcordaos pol Principáu y l’Institutu de Transición Xusta nel marcu del plan del carbón. Los oxetivos fundamentales son la reactivación turística de la contornada y la desestacionalización de Payares, cola renovación de los sos servicios pa modernizala y que s’afaiga a programes y actividaes turístiques, lúdiques y deportives acullá del calendariu de la temporada d’esquí.

Les actuaciones tán pensaes pa que l’equipamientu pueda ufiertar toa clas de servicios a lo llargo del añu. Técnicamente, el plan prevé la construcción d’un mediu mecánicu principal, amás de desplazar y modernizar los que yá esisten. Tamién se proponen intervenciones en remontes y instalaciones p’ameyorar la eficiencia enerxética.

Asina, na primer fase va executase un sistema nuevu de tresporte per cable pa la estación, qu’incluye la instalación del telecabina d’El Cuitu Nigru y l’acurtiamientu del telesiella d’El Brañiḷḷín, amás de desmontar los telesquís  La Foya y Arroyu y los telesielles Foya de Cuitu Nigru y Les Patines. Nesti mesmu periodu va acondicionase un telecabina inclusivu y adaptáu pal disfrute de primerizos, peatones y persones usuaries, tanto n’iviernu como fuera de temporada.

La estación d’esquí de Valgrande-Payares foi una de les trés primeres abiertes n’España y la primera del cordal cantábricu. Desque s’inaugurara, foi un motor económicu pal valle de Ḷḷena, onde xeneró emplegu y un movimientu empresarial y económicu bien importante.