Categories Navigation

Categories Navigation

Presidencia completa con 349 candidatos les bolses d’emplegu interines d’habilitaos nacionales pa los Conceyos

23/07/2022
  • La dotación de personal fai posible amenorgar la falta de secretarios y interventores pa garantizar el funcionamientu normal de les entidaes locales y la prestación de los servicios públicos

 

Yá ta operativa n’Asturies la tercer y última bolsa de trabayu de personal temporal pa la provisión interina de puestos de trabayu reservaos a funcionarios d’Alministración local con habilitación de calter nacional, correspondiente a la subescala d’Intervención-Tesorería nel Principáu d’Asturies.

 

La entrada en funcionamientu d’esta bolsa dexa disponer pela primer vez de 349 perfiles profesionales pa cubrir d’una manera áxil y eficaz la xestión de les vacantes que se puedan dar nes places de Secretaría, Secretaría-Intervención y Intervención-Tesorería.

 

Toes estes persones superaron les pruebes selectives convocaes pola Conseyería de Presidencia al traviés del Institutu Asturianu d’Alministración Pública Adolfo Posada y van poder incorporase a estos altos cargos de los Conceyos nun plazu de tiempu curtiu.

 

Nun disponer d’estes bolses suponía un inconveniente seriu pa les corporaciones locales; sobre manera pa les de menos entidá, que cada vez que rexistren baxes de los titulares de les places sufren una atrasu importante de la tramitación o, inclusive, la paralización absoluta. 

 

La creación d’estes bolses cumple, amás, l’oxetivu del Principáu de crear una bolsa d’emplegu pa caúna de les trés categoríes.

 La prueba selectiva de la subescala de Secretaría superáronla 144 persones, que son les que componen finalmente la bolsa de trabayu temporal. La bolsa de Secretaría-Intervención quedó integrada por 142 persones y la d’Intervención-Tesorería, por 63.