Categories Navigation

Categories Navigation

El Principáu refuerza les polítiques sociales y dedica 34 millones al plan concertáu coles entidaes locales, un 13 % más que nel 2021

24/07/2022
  • El programa nuevu simplifica la xestión, incluye pela primer vez les ayudes contra la probeza infantil y cubre tol costu de personal en conceyos de menos de 20.000 habitantes

 

El Gobiernu d’Asturies aprobó esta selmana’l plan concertáu de prestaciones básiques p’anguaño, que refuerza les polítiques sociales y facilita la concesión directa d’alredor de 34 millones a les entidaes locales pa financiar los servicios sociales básicos que dan los Conceyos: personal, caltenimientu de centros y prestaciones. La cantidá pa esta primer programación supón un aumentu próximu al 13 % en comparanza col 2021.

 

El plan nuevu simplifica la xestión y incluye pela primer vez les ayudes pa families con menores o xente mozo a cargu. Otra de les novedaes ye que cubre tolos costos en recursos humanos en conceyos de menos de 20.000 habitantes y ameyora notablemente’l financiamientu de les demás dotaciones de personal.

 

El plan concertáu ye una ferramienta básica del estáu de bienestar que dexa a les alministraciones central y autonómica collaborar nel cofinanciamientu de los servicios sociales qu’ufierten los Conceyos y entidaes locales.

 

Ente les prestaciones que xestionen les entidaes locales inclúyense la información y valoración de les demandes recibíes, les ayudes d’emerxencia, los programes d’incorporación social, la teleasistencia y l’atención a domiciliu a persones non dependientes, amás d’otres iniciatives que busquen fomentar la vida activa y saludable, como’l proyectu Rompiendo distancies y los centros rurales d’apoyu diurnu.

 

A la contribución económica del Principáu súmase’l financiamientu de los propios Conceyos y de l’Alministración Xeneral del Estáu, qu’aumenta’l global del plan a 60,5 millones y garantiza los servicios sociales básicos en toa Asturies.