Categories Navigation

Categories Navigation

El Gobiernu d’Asturies va tresformar l’albergue municipal de Cuaña nun centru social y de día pa persones mayores

25/07/2022
  • ​​​​​​El Principáu va destinar 320.000 euros a la reforma del equipamientu, que s’enmarca nel modelu nuevu de cuidaos de duración llarga
  • La conseyera Melania Álvarez visitó güei Cuaña, Castropol y Samartín d’Ozcos pa conocer les necesidaes d’estos conceyos

El Gobiernu d’Asturies va reformar l’albergue municipal de Cuaña pa convertilu nun centru social y de día pa persones mayores. El recursu futuru, que va disponer de 18 places, enmárcase nel modelu nuevu de cuidaos de duración llarga y atención a les persones en situación de dependencia que diseña la Conseyería de Derechos Sociales y Bienestar.

El Principáu va invertir 320.000 euros nesta actuación, que va canalizase con un conveniu de collaboración col Conceyu de Cuaña, cola mira de dar respuesta a les necesidaes de les persones mayores, prevenir la so institucionalización y evitar situaciones de soledá non deseada.

La conseyera de Derechos Sociales y Bienestar, Melania Álvarez, visitó güei l’albergue, que tien una superficie de más de 343 metros cuadraos, xunto a l’alcaldesa de Cuaña, Rosana González. Depués, foi a Castropol y Samartín d’Ozcos, onde aconceyó colos sos rexidores, Francisco Vinjoy y Pedro Álvarez, respectivamente, pa conocer de manera directa les necesidaes de dambos conceyos.

Álvarez tamién aprovechó la visita al occidente pa destacar que’l plan concertáu nuevu de prestaciones básiques, aprobáu la selmana pasada pol Executivu autonómicu, destina 3.326.964 euros a los 17 conceyos qu’integren l’área sociosanitaria I, un 5,5 % más que l’anterior.

El plan concertáu nuevu refuerza les polítiques sociales y facilita la concesión directa d’alredor de 34 millones a les entidaes locales pa financiar los servicios sociales básicos que dan: personal, caltenimientu de centros y prestaciones. La cantidá pa esta primer programación supón un aumentu próximu al 13 % en comparanza col 2021.

A la contribución económica del Principáu súmase la financiación de los propios Conceyos y del Gobiernu central, lo qu’aumenta’l total a 60,5 millones y garantiza los servicios sociales básicos en toa Asturies.