Categories Navigation

Categories Navigation

El Gobiernu d’Asturies abre’l plazu pa pidir les ayudes a la conciliación, dotaes con 1,1 millones de presupuestu

26/07/2022
  • Les cantidaes aumenten a 400 euros pa families con un fíu namás y a 600 pa les que tengan dos o más descendientes d’hasta 12 años

 

El tope de renta pa pidir estes subvenciones xube hasta los 45.000 euros, en comparanza colos 40.000 de la convocatoria anterior

 

El Gobiernu d’Asturies abrió güei’l plazu pa pidir les ayudes a la conciliación, dotaes con 1,1 millones. Les bases establecen que van concedese 400 euros a les families con un fíu o fía namás y 600 p’aquelles con dos o más descendientes d’hasta 12 años, según los términos alcordaos col grupu parllamentariu de Ciudadanos na negociación presupuestaria. Amás, el tope anual de renta pa poder pidir estes cantidaes aumenta hasta los 45.000 euros, en comparanza colos 40.000 de la convocatoria anterior.

 

La finalidá de les ayudes ye sofitar a les families trabayadores pa compensar los gastos que puedan tener pola contratación de servicios que posibiliten el cuidáu de fíes y fíos y faciliten la corresponsabilidá. En concreto, subvenciónense gastos como la contratación de guarderíes, xardinos d’infancia, campamentos, convivencies, ludoteques o cualquier otru serviciu de naturaleza privada empobináu al cuidáu de menores, siempre que’l gastu supere los 40 euros. Tamién se cubren los costos xeneraos pola contratación de servicios de cuidáu de menores a domiciliu o de persones emplegaes na casa pal cuidáu de menores.

 

El Boletín Oficial (Bopa) publicó ayeri los detalles d’estes subvenciones, que pueden pidise hasta’l 15 de setiembre. Na sede electrónica del Principáu (https://sede.asturias.es) ta publicada la ficha correspondiente, que se pue atopar escribiendo’l códigu AYUD0327T01 nel buscador de la cabecera (asitiáu na parte cimera derecha de la páxina). Dende esi enllaz, accédese al testu íntegru de la resolución, a la información complementaria y al formulariu normalizáu pa presentar la solicitú electrónicamente.

 

L’Executivu autonómicu llanzó la primer convocatoria de sofitu a la conciliación nel 2021. Daquella, concediéronse 1.008 ayudes por una cantidá de 288.424 euros. Esta midida volvió formar parte del diálogu parllamentariu que dexó aprobar el presupuestu d’anguaño. Como resultáu d’esa negociación, y a instancies del grupu parllamentariu de Ciudadanos, el Principáu comprometióse a aumentar tanto la cantidá de les ayudes como’l tope máximu de renta anual pa tener derechu a elles.